لاہور: پاکستان کرکٹ بورڈ نے پی ایس ایل سکس کو عالمی وبا کرونا سے بچانے کے لئے بڑا فیصلہ کیا ہے اور تمام فرنچائزر سے تعاون کی درخواست بھی کردی ہے۔
اسلام آباد یونائیٹڈ کےپاکستانی نژاد آسٹریلوی اسپنر فواد احمد کے کرونا ٹیسٹ مثبت آنے پر پی سی بی حکام میں تشویش کی لہر ڈور گئی ہے اور کرکٹ بورڈ نے پاکستان کے سب سے بڑے ایونٹ پی ایس ایل کو عالمی وبا سے بچانے کے لئے فوری اقدامات کرنا شروع کردئیے ہیں۔
پی سی بی کی جانب سے جاری بیان کے مطابق گزشتہ رات سے اب تک ایک سو انہتر پی سی آر ٹیسٹ کرائےگئے، جن میں سے مزید تین ممبران کے ٹیسٹ پازیٹو آئے ہیں، رپورٹ مثبت آنے کے بعد تینوں کو قرنطینہ کردیا گیا ہے۔
پاکستان کرکٹ بورڈ نے اپنے بیان میں کہا کہ پی ایس ایل کو کووڈ نائنٹین سے پاک رکھنے کے لئے ہر چوتھے روز پی سی آر ٹیسٹنگ کا عمل دہرانے کا فیصلہ کیا ہے، ساتھ ہی تمام فرنچائزز کےتعاون سے مزید سخت ترین اقدامات کئےجارہےہیں، اسی سلسلے میں پی ایس ایل حکام آج تمام ٹیم مالکان سے اہم ملاقات کرینگے۔
