لاہور (10 مئی 2026): پاکستان کرکٹ بورڈ (پی سی بی) کے چیئرمین محسن نقوی نے زمبابوے کے خلاف سیریز میں کلین سویپ کرنے پر قومی خواتین کرکٹ ٹیم کو زبردست خراجِ تحسین پیش کیا ہے۔
چیئرمین پی سی بی محسن نقوی نے اپنے خصوصی پیغام میں کہا کہ خواتین کرکٹ ٹیم نے زمبابوے کو 3 صفر سے شکست دے کر پوری قوم کا سر فخر سے بلند کر دیا ہے۔
انہوں نے اس فتح کو ‘مدرز ڈے’ کے حوالے سے بہترین انداز قرار دیتے ہوئے کہا کہ ہم اس تاریخی کامیابی کو پورے پاکستان کی ماؤں کے نام کرتے ہیں۔
محسن نقوی نے قومی ویمن ٹیم کی شاندار کارکردگی کی تعریف کرتے ہوئے کہا کہ ٹیم کے تمام کھلاڑی اور سپورٹ اسٹاف مبارکباد کے مستحق ہیں۔ ان کا کہنا تھا کہ پاکستان میں خواتین کرکٹ کا مستقبل انتہائی روشن ہے اور پی سی بی خواتین کھلاڑیوں کی حوصلہ افزائی جاری رکھے گا۔
چیئرمین پی سی بی نے کھلاڑیوں کو مخاطب کرتے ہوئے کہا کہ قومی ٹیم اسی طرح محنت اور جذبے سے کھیلتی رہے، پورے پاکستان کو آپ پر فخر ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں