لاہور: ایشیاکپ اور ورلڈٹی ٹوئنٹی میں بدترین کارکردگی کے بعد پاکستان کرکٹ بورڈ میں اکھاڑ پچھاڑشروع ہوگئی، چیف سلیکٹر ہارون رشید کی سلیکشن کمیٹی کوتحلیل کردیاگیا۔
پی سی بی نے انکوائری کمیٹی کی رپورٹ کی روشنی میں اہم فیصلے کرلئے، نئےکوچ کے تقرر کے لئے وسیم اکرم اور رمیزراجہ پرمشتمل کمیٹی بنادی ہے۔ کمیٹی کوچ کی تقرری کے لیے پی سی بی کی معاونت کرے گی۔ نئے کوچ، سلیکشن کمیٹی اور ٹی ٹوئنٹی کپتان کااعلان جلد کیا جائے گا۔
چیئرمین پی سی بی شہریارخان نےتحقیقاتی کمیٹی کی سفارشات تسلیم کرتے ہوئے کہا ہے کہ کرکٹ کے بہترین مفاد میں فیصلے کئے۔ وقاریونس، شاہد آفریدی اور سلیکشن کمیٹی کی خدمات پران کے مشکور ہیں۔
پی سی بی کےاعلامیے کے مطابق ورلڈٹی ٹوئنٹی میں شکست کی اہم وجہ کھلاڑیوں کی خراب فٹنس تھی لہذا سینٹرل کنٹریکٹ میں اب کھلاڑیوں کی فٹنس کی شق بھی شامل کی جائے گی۔
اس سے قبل ہیڈ کوچ وقاریونس اور ٹی ٹوئنٹی کپتان شاہد خان آفریدی بھی اپنے عہدوں سے استعفیٰ دے چکے ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں