لاہور: ایشیا کپ اورورلڈٹی ٹوئنٹی میں بدترین کارکردگی کےبعدپاکستان کرکٹ بورڈ میں اکھاڑ پچھاڑ شروع ہوگئی،بورڈ نے چیف سلیکٹرہارون رشید کی سلیکشن کمیٹی کو تحلیل کردیاگیا۔
پی سی بی میں ورلڈ ٹی ٹوئنٹی میں ناقص کارکردگی کے آفٹرشاکس برقرار ہیں کپتان اورکوچ کے بعد کرکٹ بورڈ کی ایک اوروکٹ گرگئی، ہارون رشید کی زیرقیادت سلیکشن کمیٹی کا بوریا بستر گول کردیا گیا۔
پی سی بی نے انکوائری کمیٹی کی رپورٹ کی روشنی میں اہم فیصلے کرلئے، نئےکوچ کی کھوج کیلئے وسیم اکرم اورزمیزراجہ پرمشتمل کمیٹی بنادی ہے۔
کمیٹی کوچ کی تقرری کے لیے پی سی بی کی معاونت کرے گی، نئے کوچ، سلیکشن کمیٹی اور ٹی ٹوئنٹی کپتان کااعلان جلد کیا جائے گا۔
چیئرمین پی سی بی شہریارخان نے تحقیقاتی کمیٹی کی سفارشات مان لیں، انہوں نے کہا کہ کرکٹ کے بہترین مفاد میں فیصلے کئے۔ وقار یونس، شاہد آفریدی اور سلیکشن کمیٹی کی خدمات پر ان کے مشکور ہیں۔
پی سی بی کےاعلامیے کے مطابق ورلڈٹی ٹوئنٹی میں شکست کی اہم وجہ کھلاڑیوں کی خراب فٹنس تھی۔ سینٹرل کنٹریکٹ میں اب کھلاڑیوں کی فٹنس کی شق بھی شامل کی جائیگی، پاکستان کرکٹ ٹیم کا کنڈیشنل کیمپ مئی میں ایبٹ آباد میں لگایا جائیگا۔
