The news is by your side.

Advertisement

پی ایس ایل سیزن 6 سے متعلق پی سی بی کا بڑا اعلان

کراچی: پاکستان کرکٹ بورڈ نے پی ایس ایل سکس سے متعلق اہم اعلان کردیا ہے۔

تفصیلات کے مطابق ڈائریکٹر میڈیا پی سی بی سمیع الحسن برنی نے کراچی میں نیوز کانفرنس کرتے ہوئے گذشتہ روز اسلام آباد یونائٹیڈ کے کھلاڑی کے کرونا ٹیسٹ مثبت آنے کے بعد پیدا ہونے والی صورت حال پر بورڈ کا نقطہ نظر پیش کیا۔

سمیع الحسن برنی نے میڈیا کو بتایا کہ کھلاڑی فواد احمد کا کرونا ٹیسٹ مثبت آنے کے بعد کل سے اب تک 244پی سی آر ٹیسٹ کئےگئے، پی سی آر ٹیسٹ تین افراد کی رپورٹ مثبت آئی ہے، اس کے ساتھ ہی پی ایس ایل میں کرونا کے مثبت کیسز کی تعداد چار ہوگئی ہے۔

ڈائریکٹر میڈیا پی سی بی سمیع الحسن برنی نے بتایا کہ پی سی آر ٹیسٹ مثبت آنیوالے افراد دس دن قرنطینہ میں رہیں گے، تینوں افراد کے جمعرات کو ریپڈ ٹیسٹ کئےجائیں گے، یہ کہنا مشکل ہے کہ تین افراد کے ٹیسٹ مثبت کیسے آئے؟ انہوں نے بتایا کہ فواد احمد سمیت چاروں مثبت کیسز کی بہترین نگہداشت ہورہی ہے۔

سمیع الحسن برنی کا نیوز کانفرنس میں کہنا تھا کہ 112براڈ کاسٹ کریو کے بھی ریپڈ ٹیسٹ ہوئے ہیں، آرگنائزنگ کمپنی نے حفاظتی اقدامات اپنانے کا کہا ہے، چاہے ہوٹل ہوں یا گراؤنڈ ، عالمی وبا سے بچنے کے لئے سخت اقدامات کرنا ہونگے، اس سلسلے میں تین بجے پی ایس ایل کی آرگنائزنگ کمیٹی ورچوئل میٹنگ کرےگی، ورچوئل میٹنگ میں ٹیم فرنچائزز اور پی سی بی حکام شریک ہونگے۔

سمیع الحسن برنی کا کہنا تھا کہ ورچوئل میٹنگ میں بہت سی چیزوں پربات ہوگی، میٹنگ میں تمام فرنچائزز کو اعتماد میں لیاجائیگا، واضح کردوں کہ پی ایس ایل کے باقی میچز شیڈول کے مطابق ہوں گے۔

کھلاڑیوں کے بائیو سیکیور ببل سے متعلق ڈائریکٹرمیڈیا پی سی بی سمیع الحسن برنی کا کہنا تھا کہ اس وقت ببل کے اندر تین سو کے قریب لوگ موجود ہیں،  ببل میں جو بھی آتا ہے وہ پروٹوکول فالو کرکے آتا ہے ، ببل کے اندر کھلاڑیوں کو ماسک پہننے کی ضرورت نہیں ہے۔

انہوں نے مزید کہا کہ پچاس فیصد تماشائی میدان میں آئیں گے، فائنل کا فیصلہ بعد میں ہوگا، سولہ مارچ تک کےمیچز پچاس فیصد تماشائیوں کے ساتھ ہوں گے۔

Comments

یہ بھی پڑھیں