پی سی بی کا نئے سینٹرل کنٹریکٹ پرکشش اضافے کے ساتھ دینے کا فیصلہ pcb
The news is by your side.

Advertisement

پی سی بی کا نئے سینٹرل کنٹریکٹ پرکشش اضافے کے ساتھ دینے کا فیصلہ

لاہور: پاکستان کرکٹ بورڈ (پی سی بی) نے کھلاڑیوں کو نئے سینٹرل کنٹریکٹ پرکشش اضافے کے ساتھ دینے کا فیصلہ کیا ہے۔

ذرائع کا کہنا ہے کہ 31 کھلاڑیوں کو نیا سینٹرل کنٹریکٹ دیا جائے گا، قومی کرکٹ ٹیم کے کپتان سرفراز احمد سے مشاورت مکمل ہوگئی ہے جس کے بعد سرفراز نے اضافے کے نئے شیڈول پر دستخط بھی کردئیے۔

پی سی بی کی جانب سے سینٹرل کنٹریکٹ کا اعلان ایک دو روز میں کردیا جائے گا، تاہم پی سی بی نے ریجنل کوچز، امپائرز، ریفریز سمیت دیگر ملازمین کی تنخواہوں میں بھی کارکردگی سے مشروط اضافہ کردیا ہے۔

اوپنر احمد شہزاد کی سینٹرل کنٹریکٹ میں شمولیت کا امکان نہیں، عمر اکمل پہلے ہی کنٹریکٹ میں شامل نہیں ہیں جبکہ وہاب ریاض اور محمد حفیظ کی اے کیٹگری سے بی میں تنزلی ہوگی۔

بابر اعظم، حسن علی، فخر زمان سمیت چند نوجوان کرکٹرز کی ترقی ہوگی، شان مسعود، شاہین آفریدی، سعد علی اور میر حمزہ سمیت 6 سے 7 کھلاڑیوں کو بھی فہرست میں شامل کیا جارہا ہے۔

مزید پڑھیں: پی سی بی کا ڈومیسٹک امپائرز، میچ ریفریز کو سینٹرل کنٹریکٹ دینے کا فیصلہ

کھلاڑیوں کا سینٹرل کنٹریکٹ 30 جون کو ختم ہوا تھا، چند روز میں نئے سینٹرل کنٹریکٹ کا اعلان کیا جائے گا، جس کا اطلاق یکم جولائی سے ہوگا، کرکٹرز کے معاوضوں میں تین سال بعد پرکشش اضافہ کیا جارہا ہے۔

ذرائع کے مطابق کھلاڑی کی تنخواہ میں 40 سے 45 فیصد اضافہ متوقع ہے، اے کیٹگری میں شامل کھلاڑی کو ماہانہ ساڑھے 6 لاکھ روپے ملتے تھے، تجویز کیے گئے اضافے کے بعد اب نہیں تقریباً ساڑھے 9 لاکھ روپے ملیں گے۔

بی کیٹگری کے کھلاڑیوں کو پانچ لاکھ روپے سے بڑھ کر سات لاکھ پچیس ہزار روپے، سی کیٹگری میں شامل کھلاڑی کو 2 لاکھ ساٹھ ہزار روپے سے بڑھ کر اب تین لاکھ 77 ہزار روپے جبکہ ڈی کیٹگری میں شامل کھلاڑیوں کو ایک لاکھ اسی ہزار سے بڑھ کر 2 لاکھ اکسٹھ ہزار روپے ملیں گے۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Comments

comments

یہ بھی پڑھیں