اسلام آباد میں دفعہ 144 کے نفاذ کے باوجود حکومتی اتحادی جماعت پی ڈی ایم آج سپریم کورٹ کے خلاف احتجاج کرے گی جس میں شرکت کے لیے قافلے دارالحکومت آ رہے ہیں۔
اے آر وائی نیوز کے مطابق اسلام آباد میں دفعہ 144 نافذ ہے جب کہ وفاقی وزرا اسحاق ڈار اور رانا ثنا اللہ بھی پی ڈی ایم سربراہ فضل الرحمان سے آج سپریم کورٹ کے باہر احتجاج نہ کرنے کی دو بار درخواست کرچکے ہیں تاہم فضل الرحمان احتجاج پر ڈٹ گئے ہیں اور انہوں نے دونوں بار یہ درخواست مسترد کر دی ہے۔ دھرنا کہاں دیا جائے گا اس کا فیصلہ پی ڈی ایم اتحادیوں سے مشاورت سے کرے گی۔
آج کے احتجاج کے حوالے سے مولانا فضل الرحمان نے اپنے ٹویٹ میں کہا ہے کہ اب فیصلہ عوام کی عدالت میں ہوگا۔ کارکنوں کے قافلے روانہ ہوچکے ہیں۔
آج کے احتجاج اور دھرنے میں ن لیگ اور پیپلز پارٹی نے بھرپور شرکت کا اعلان کیا ہے۔ اے این پی نے شرکت سے انکار کر دیا ہے جب کہ ایم کیو ایم نے فیصلہ رابطہ کمیٹی پر چھوڑ دیا ہے۔
احتجاج اور دھرنے میں شرکت کے لیے جے یو آئی، ن لیگ اور پیپلز پارٹی کے قافلے براستہ مری روڈ اسلام آباد جائیں گے۔ جے یو آئی کا قافلہ کچھ دیر میں صدر سے روانہ ہوگا جو مریڑ چوک، کمیٹی چوک، چاندی چوک، شمس آباد سے ہوتا ہوا فیض آباد پہنچے گا۔
فیض آباد پر دیگر قافلے مرکزی قافلے میں شامل ہو کر اسلام آباد میں داخل ہوں گے۔ پی پی کے کارکنان علامہ اقبال پارک کے باہر جمع ہوں گے۔
پی ڈی ایم کے سپریم کورٹ کے خلاف احتجاج کے باعث راولپنڈی میں سیکیورٹی ہائی الرٹ ہے اور مری روڈ پر پولیس کی بھاری نفری تعینات کر دی گئی ہے۔
دوسری جانب پی ڈی ایم کے احتجاج میں شرکت کے لیے کراچی، پشاور، مالاکنڈ، خان پور، سیالکوٹ، چونیاں، تاندلیانوالہ، چشتیاں، خیبر ودیگر شہروں سے قافلے اسلام آباد کی جانب گامزن ہیں۔
واضح رہے کہ سپریم کورٹ کی جانب سے پنجاب میں 14 مئی کو انتخابات کرانے کے حکم نامے پر عمل نہیں ہوسکا۔ عدالت عظمیٰ آج الیکشن کے حوالے سے ہی ایک درخواست کی بھی سماعت کرے گا۔
