کراچی: شہر قائد کے علاقے جمشید ٹاؤن سے دو سے تین فوٹ لمبا پینگولین جانور برآمد ہوا، پولیس نے پینگولین جانور کو تحویل میں لیکر تھانے منتقل کردیا ۔
پولیس حکام کے مطابق جمشید ٹاؤن اسلامیہ کالج کے قریب رہائشی گلی سے دو سے تین فٹ لمبا پینگولین جانور ملا، جس کے بعد اہل علاقہ نے پولیس کو کال کی ، پولیس اہلکاروں نے پینگولین جانور کو تحویل میں لیکر جمشید کوارٹر تھانے منتقل کردیا ہے۔
پولیس کاکہنا ہے کہ پینگولین ملنے کے بعد انتظامیہ کو کال کی گئی تھی تاہم وہ تاحال نہیں پہنچی، چڑیا گھر انتظامیہ کے پہنچنے پر جانور ان کی تحویل میں دیا جائے گا ، پینگولین کے تھانے منتقل کرتے ہی شہریوں اورپولیس اہلکاروں کی بڑی تعداد جانور کو دیکھنے تھانے پہنچ گئی۔
پاک و ہند میں پایا جانے والا انڈین پینگولن ایک بے ضرر اور نایاب جانور ہے جس کی نسل ختم ہونے کے قریب ہے۔
’’پینگولن‘‘ ایک نایاب نسل کا جانور ہے، یہ چیونٹی خور جانوروں کی نسل سے تعلق رکھنے والا ایک بے ضرر اور معصوم جانور ہے ۔ پینگولین محض کیڑے مکوڑے دیمک اور چیونٹیاں کھاتا ہے۔
اس کی لمبی تھوتنی اور باریک لمبی زبان ہوتی ہے، جسم پر سخت چھلکے ہوتے ہیں۔ خطرے کے وقت خود کو گیند کی طرح لپیٹ لیتا ہے۔
پینگولن کو ان جانوروں کی فہرست میں شامل کیا جاتا ہے جن کی نسل ختم ہونے کے خطرے سے دوچار ہے، پاکستان میں لوگ اپنی لاعلمی کی وجہ سے اس نایاب جانور کو خوفناک بلا سمجھ کر ہلاک کردیتے ہیں۔
