پیرس : فرانس میں ریٹائرمنٹ کی حد عمر 2سال تک بڑھانے کے حکومتی فیصلے کیخلاف عوام کے صبر کا پیمانہ لبریز ہوگیا۔ شہر بھر میں ایک بار پھر ہنگامے پھوٹ پڑے۔
مظاہرین مذکورہ اصلاحات کو واپس لینے کا مطالبہ جاری رکھے ہوئے ہیں۔ مشتعل افراد نے کچرے کے ڈبوں کو آگ لگا دی، ٹریفک لائٹس توڑ دیں، کچھ جنونیوں نے بینک کی کھڑکیوں اور اے ٹی ایم مشینوں میں بھی توڑ پھوڑ کی۔
غیر ملکی خبر رساں ادارے کی رپورٹ کے مطابق مظاہروں کے دوران سڑکوں پر جلاؤ گھیراؤ، پتھراؤ کے بعد مظاہرین کی پولیس سے جھڑپیں، پولیس نے مظاہرین کو منتشر کرنے کیلئے آنسو گیس کے شیل برسا دیے۔
واضح رہے کہ گزشتہ روز فرانسیسی صدر ایمانوئل میکرون نے آرٹیکل 49.3 کا سہارا لے کر قومی اسمبلی میں بغیر ووٹ کے متنازعہ پنشن اصلاحات کے منصوبے کو منظور کرلیا جس کے بعد ملک میں محاذ آرائی کی صورتحال پیدا ہوگئی ملک بھر میں اقدام کی شدید مذمت کی جارہی ہے۔
میکرون کے اس اقدام سے فرانس میں غم و غصہ کی لہر دوڑ گئی ہے۔ بہت سی یونینز مشتعل ہوگئیں اور انہوں نے اس اقدام کو جمہوریت سے متصادم قرار دیتے ہوئے مظاہرے جاری رکھنے کی اپیل کردی۔
