کراچی : مسلم لیگ (ن) سندھ کے ترجمان اسد عثمانی کا کہنا ہے کہ کراچی کے عوام مریم نواز جیسا وزیراعلیٰ چاہتے ہیں اور اب پیپلز پارٹی پر بھروسہ کرنے کو تیار نہیں۔
تفصیلات کے مطابق مسلم لیگ (ن) سندھ کے ترجمان اسد عثمانی نے میئر کراچی مرتضیٰ وہاب پر شدید تنقید کرتے ہوئے کہا ہے کہ وفاق پر تنقید کرنے سے پہلے میئر کو اپنا رویہ اور کارکردگی دیکھنی چاہیے۔
ان کا کہنا تھا کہ مرتضیٰ وہاب دنیا کے واحد میئر ہیں جو اپنے ہی شہر کے ترقیاتی کام خود رکواتے ہیں۔
ترجمان مسلم لیگ (ن) سندھ نے کہا کہ کراچی کے عوام مریم نواز جیسا فعال اور بااختیار وزیراعلیٰ چاہتے ہیں جو عوامی مسائل حل کرنے کی صلاحیت رکھتی ہو، کراچی کی عوام اب پیپلز پارٹی پر بھروسہ کرنے کو تیار نہیں۔
اسد عثمانی نے واضح کیا کہ کراچی کو وفاق کے حوالے کرنا مسلم لیگ (ن) کی خواہش نہیں، تاہم شہر کی بدحالی کی اصل ذمہ داری سندھ حکومت پر عائد ہوتی ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں