کراچی: متحدہ قومی موومنٹ کے دفاتر مسمار کیے جانے کے بعد اب پیپلز امن کمیٹی کے دفاتر گرانے کا سلسلہ شروع کردیا گیا،لیاری میں امن کمیٹی کے تین دفاتر مسمار کردیے گئے۔
تفصیلات کے مطابق لیاری کے علاقے بغدادی میں سیکیورٹی اداروں کی موجودگی میں پیپلز امن کمیٹی کے تین دفاتر مسمار کردیے گئے ۔
نمائندہ اے آر وائی نیوز نذیر شاہ کے مطابق دفتر کو بلڈوزر کے ذریعے مسمار کیا گیا، دفتر گرائے جانے کے وقت لیاری چیل چوک پر رینجرز اور پولیس کی بھاری نفری موجود تھی تاکہ کسی بھی ناخوشگوار صورتحال سے نمٹ سکے۔
سیکیورٹی اداروں کی موجودگی میں ہی چاکی واڑہ میں قائم کالعدم پیپلز امن کمیٹی کے سربراہ عزیز بلوچ کا فارم ہائوس بھی مسمار کردیا گیا۔
ایم کیو ایم کے مزید دو دفاتر مسمار
دریں اثنا گلشن اقبال اور گلستان جوہر میں ایم کیو ایم کے مزید دو دفاتر مسمار کردیے گئے جس کے بعد ایم کیو ایم کے گرائے جانے والے دفاتر کی تعداد تقریبا 140 ہوگئی۔
رافع حسین نمائندہ اے آر وائی نیوز کے مطابق یہ دونوں دفاتر سرکاری اراضیوں پر قائم کئے گئے تھے۔
