سسسٹم بچانے کیلئے وزیراعظم فوری طورپرمستعفی ہوں، پیپلزپارٹی -
The news is by your side.

Advertisement

سسسٹم بچانے کیلئے وزیراعظم فوری طورپرمستعفی ہوں، پیپلزپارٹی

اسلام آباد : پیپلز پارٹی نے ایک بار پھر سسٹم بچانے کے لیے وزیر اعظم نوازشریف سے استعفیٰ کا مطالبہ کردیا، پی پی رہنماؤں اعترازاحسن، شیری رحمان اور فرحت اللہ بابر نے کہا ہے کہ شریف خاندان سسٹم کو ڈی ریل کررہا ہے، ملک  کو مزید بحرانوں میں مت ڈالا جائے۔

تفصیلات کے مطابق پانامہ جے آئی ٹی کی رپورٹ کے بعد بلاول بھٹو کی زیرصدارت پیپلز پارٹی کا مشاورتی اجلاس زرداری ہاؤس اسلام آباد میں ہوا۔ اجلاس میں سسٹم کو بچانے کیلئے وزیر اعظم سے استعفے کا مطالبہ کیا گیا۔

بلاول بھٹو نے رہنماؤں کو وزیراعظم کے استعفی کیلئے تمام جماعتوں کوایک نکتہ پراکٹھا کرنے کی ہدایت بھی دی۔ اجلاس کے بعد میڈیا سے گفتگو کرتے ہوئے شیری رحمان نے کہا نواز شریف اخلاقی ہی نہیں بلکہ حکمرانی کرنے کا قانونی جواز بھی کھو چکے ہیں کہ وہ اس منصب پر رہیں۔

ان کا کہنا تھا کہ پیپلزپارٹی نے جمہوریت کو بچانے کیلئے قربانیاں دیں، (ن) لیگ سے گزارش ہے کہ جے آئی ٹی رپورٹ کو ذرا غورسے پڑھ لیں، افسوس ہے کہ نوازشریف نوشتہ دیوارنہیں پڑھ رہے جبکہ پی آئی ڈی کو مسلم لیگ (ن) کی جانب سے اپنے دفاع کے لئے استعمال کیاجارہاہے۔

اعتزازاحسن نے کہا کہ نون لیگ اگر بھٹو جیسی سازش کی بات کر رہی ہے تو یہ عدلیہ اور فوج پر براہ راست الزام ہے، انہوں نے کہا کہ وزیر اعظم کے استعفے سے اسمبلیاں نہیں ٹوٹیں گی بلکہ نواز شریف ہی استعفی ٰ دیں گے۔

اعتزز احسن کا کہنا تھا کہ شریف خاندان کی جانب سے سپریم کورٹ میں جعلی دستاویزات جمع کرائی گئیں، مجھے توقع نہیں تھی کہ گریڈ20کے افسران اتنی اچھی تحقیقات کریں گے۔

فرحت اللہ بابر نے کہا کہ لیگی وزراء جے آئی ٹی رپورٹ کی وضاحتیں دینے میں لگے ہوئے ہیں، حکومت اور وزیر اعظم متنازع ہوگئے ہیں، نوازشریف فوری طور پر اپنے عہدے سے مستعفی ہوں ورنہ بحران بڑھتاجائے گا۔

Comments

comments

یہ بھی پڑھیں