اسلام آباد: ملائیشیا میں محصور پاکستانیوں کے لیے وزیر اعظم عمران خان کی ذاتی کوششیں رنگ لے آئیں۔
تفصیلات کے مطابق ملائیشیا میں محصور پاکستانیوں کو رہائی مل گئی، وطن واپس لانے کے معاملے میں وزیر ہوا بازی غلام سرور خان نے ذاتی دل چسپی دکھائی، انھوں نے کہا کہ پاکستانیوں کی رہائی میں وزیر اعظم عمران خان کی ذاتی کوششیں شامل ہیں۔
وفاقی وزیر برائے ہوا بازی غلا م سر ور خان نے پی آئی اے کے سی ای او کو مسافروں کا بھرپور خیال رکھنے کی ہدایات کر دی ہے، 300 سے زائد پاکستانی پی آئی اے کی خصوصی پرواز کے ذریعے کل 31 دسمبر کو وطن واپس پہنچیں گے۔
غلام سرور خان نے کا کہنا تھا کہ پاکستانیوں کو جلد از جلد واپس لانے کے لیے خصوصی پرواز کا بندوبست کیا گیا ہے، مذکورہ پاکستانی ملائیشین حکام کی تحویل میں تھے۔
پاکستان نے مسلم امہ کی تقسیم کی وجہ سے ملائیشیا سمٹ میں شرکت نہیں کی، دفترخارجہ
خیال رہے کہ رواں ماہ پاکستان نے کوالالمپور سمٹ میں شرکت کرنی تھی تاہم وزیر اعظم عمران خان نے سعودی عرب کے دورے سے آنے کے بعد اس سمٹ میں شرکت کرنے سے معذرت کر لی تھی، انھوں نے ملائیشیا کے وزیر اعظم مہاتیر محمد کو فون کر کے شرکت سے معذوری ظاہر کی تھی۔
تاہم بعد میں ترک صدر رجب طیب اردوان نے ایک بیان میں کہا کہ پاکستان سمٹ میں اس لیے شریک نہیں ہوا کیوں اس پر سعودی عرب کا دباؤ تھا۔ پاکستان کے ساتھ سعودی عرب نے بھی اس تاثر کی باقاعدہ تردید کی تھی۔
