اسلام آباد : حکومتی مذاکراتی کمیٹی کے سربراہ پرویز خٹک نے کہا ہے کہ جے یو آئی نے معاہدہ توڑا تو نتائج کی ذمہ داری خود ہوگی، مظاہرین کو ہینڈل کرنے کیلئے انتظامیہ کو فری ہینڈ دیا ہے، غیرمعمولی صورتحال پرانتظامیہ قانون پرعملدرآمد کی مجاز ہے۔
تفصیلات کے مطابق آزادی مارچ پر حکومت کی مذاکراتی کمیٹی کے سربراہ پرویز خٹک نے میڈیا کو بریفنگ دیتے ہوئے کہا دھرنے کیلئے جگہ کا انتخاب جے یو آئی نے خود کیا، جےیوآئی کیساتھ مذاکرات کے 3دور ہوئے، جس میں مذاکرات کے 2 دور ناکام ہوئے، تیسرے دور میں جے یو آئی کی مرضی کے مطابق جگہ دی۔
پرویزخٹک کا کہنا تھا کہ حکومت نے پریڈ چوک کا کہا اور جے یو آئی نے ڈی چوک مانگا تھا، جے یو آئی نے معاہدہ توڑا تو نتائج کی ذمہ داری خود ہوگی۔
کمیٹی کے سربراہ نے کہا پہلے معاہدہ حکومتی کمیٹی اور جے یو آئی کے درمیان ہوا، مسودہ فائنل کر کے ضلعی انتظامیہ کو دیا گیا ہے، مسودے کے بعد ضلعی انتظامیہ، جے یو آئی میں تحریری معاہدہ ہوا ، مظاہرین کو ہینڈل کرنے کیلئے انتظامیہ کو فری ہینڈ دیا ہے، غیر معمولی صورتحال پر انتظامیہ قانون پر عملدرآمد کی مجاز ہے۔
مزید پڑھیں : آزادی مارچ آج شہر اقتدار میں داخل ہوگا
خیال رہے مولانا فضل الرحمان کا قافلہ گجرخان سے آج اسلام آباد پہنچے گا، اسلام آباد میں مولانا کے آزادی مارچ کا اسٹیشن تیارکرلیا گیا ہے اور ایچ نائن سیکٹرمیں سو ایکڑ کے میدان پر تیاریاں مکمل ہوگئیں ہیں۔
اس موقع پر اسلام آباد میں سیکیورٹی کے سخت انتظامات کئے گئے ہیں اور حکومت نے واضح کردیا آزادی مارچ والے آئیں، جلسہ گاہ تک جائیں،کوئی رکاوٹ نہیں ملے گی لیکن ریڈزون میں داخلے کی کوشش پر طاقت کا استعمال کیا جاسکتا ہے۔
