پشاور : خیبر پختونخواہ کی پولیس نے دعویٰ کیا ہے کہ پشاور کی مسجد میں ہونے والے بم دھماکے میں استعمال ہونے والا بارودی مواد ایک گاڑی کے ذریعے پولیس لائن منتقل کیا گیا۔
تفصیلات کے مطابق پشاور میں پولیس لائنز کی مسجد میں ہونے والے بم دھماکے کی تحقیقات جاری ہے۔
پولیس نے بتایا ہے کہ تحقیقاتی ٹیموں نے پولیس لائن گیٹ اور خیبر روڈ کی فوٹیجز کامعائنہ کرلیا، فوٹیج میں موٹر سائیکل پر سوار دو مشتبہ افراد واضح طور پر دکھائی دے رہے ہیں۔
پولیس حکام نے انکشاف کیا کہ بارودی مواد مبینہ طور پر گاڑی کے ذریعے پولیس لائن منتقل کیا گیا۔
پولیس کے مطابق گزشتہ روز پولیس لائن میں 140 افراد پولیس لائن میں داخل ہوئے جبکہ تفتیشی ٹیم پولیس بیرکوں میں موجود لوگوں کی پروفائلنگ کر رہی ہے۔
یاد رہے پشاور کی مسجد میں ہونے والے ہولناک دھماکے میں اب تک جاں بحق ہونے والوں کی تعداد 92 ہوگئی۔
سیکیورٹی حکام نے بتایا کہ دھماکہ پیر کی دوپہر 1 بج کر 40 منٹ پر اس وقت ہوا جب ظہر کی نماز ادا کی جا رہی تھی جس کے نتیجے میں مسجد کی چھت گر گئی۔
