The news is by your side.

Advertisement

خیبرپختونخواہ عوام کے لیے خوش خبری، بی آر ٹی کی بحالی کا اعلان

پشاور: خیبرپختونخواہ کے دارالحکومت میں بی آر ٹی بس سروس کو ایک بار پھر فعال کردیا گیا۔

نمائندہ اے آر وائی نیوز کے مطابق صوبائی دارالحکومت پشاور میں بین الاقوامی معیار کے اصولوں پر قائم کی جانے والی بی آر ٹی بس سروس کو ایک بار پھر فعال کر دیا گیا۔

بی آرٹی سروس کو ٹرانس پشاور اور بس کمپنی ماہرین کی ان تھک محنت اور تمام تکنیکی فالٹ کے سد باب کے بعد عوام کہ لئے بحال کرنے کا اعلان کیا گیا۔

سروس کی بحالی کے ساتھ ساتھ ایکسپریس روٹ جس میں 11اسٹیشنز شامل ہیں اور حیات آباد سے خیبر بازار تک خصوصی روٹ کا بھی اجرا کردیا گیا۔

بی آر ٹی سروس میں نئے روٹ کو شامل کرنے کا مقصد شہریوں کو مزید سہولیات فراہم کرنا اور عوام کے رش کو کم کرنا ہے۔

ترجمان بی آر ٹی پشاور کا کہنا تھا کہ تمام بسوں کی جامع تحقیقات، نئے آلات کی تنصیب، لوڈ اور روڈ ٹیسٹنگ کی گئی ہے، شہریوں کو محفوظ، ماحول دوست، سستی اور معیاری سفری سہولت فراہم کرنا ادارے کی اولین ترجیح ہے۔

انہوں  نے کرونا کا پھیلاؤ روکنے کے لیے مسافروں سے اپیل کی کہ وہ بس میں سفر کرتے وقت ماسک کا استعمال لازمی کریں۔

اُن کا کہنا تھا کہ ’مسافر بی آر ٹی سروس سے بھر پور استفادہ کریں مگر بسوں میں نصب خواتین، معذور اور معمر افراد کی نشستوں پر بیٹھنے سے اجتناب کریں‘۔

اُن کا کہنا تھا کہ ’بی آرٹی مسافروں کو ہر اسٹیشن پر 2سے 4منٹ کے وقفے کے بعد اگلی بس میسر ہوگی چناچہ مسافر اسٹیشن اور بسوں میں رش سے گریز کریں‘۔

بی آر ٹی کے ترجمان کا مزید کہنا تھا کہ ’مسافر کسی بھی شکایت یا تجویز کی صورت میں ٹرانس پشاور کی ہیلپ لائن 091-111-477-477 پر رابطہ کریں‘۔ دوسری جانب شہریوں نے بی آرٹی کی بحالی پر خوشی کا اظہار کرتے ہوئے سفری منصوبے کے اجرا پر صوبائی حکومت کا شکریہ بھی ادا کیا۔

Comments

یہ بھی پڑھیں