پشاور : سی ٹی ڈی پشاور نے ججز کی گاڑی پر خودکش حملے کا مقدمہ درج کرلیا، ایف آئی آر کی کاپی اے آر وائی نیوز نے حاصل کرلی ہے جبکہ خودکش بمبار کے اعضا ڈی این اے ٹیسٹ کے لئے بھیج دیئے گئے ہیں۔
تفصیلات کے مطابق پشاور حیات آباد میں ججز کی گاڑی پر خودکش حملہ کا مقدمہ نامعلوم دہشتگردوں کے خلاف درج کرلیا گیا ہے، تھانہ حیات آباد نے معاملہ سی ٹی ڈی کے سپرد کردیا ہے۔
کاؤنٹر ٹیررازم ڈیپارٹمنٹ نے ایس ایچ او حیات آباد کی سفارشات پر حملے کا مقدمہ درج کیا ، ایف آئی آر میں انسداد دہشت گردی ایکٹ کی دفعات شامل جائے وقوعہ سے خودکش حملہ آور کے اعضاء اکھٹے کرکے ڈی این اے ٹیسٹ کیلئے بھیج دئیے گئے ہیں۔
حکام کا کہنا ہے کہ حملہ آور کی شناخت کے لئے چہرے کو سرجری کے ذریعے ٹھیک کیا جائے گا۔
مزید پڑھیں : پشاور میں خود کش حملہ‘ 1شہید‘ 4 زخمی
یاد رہے کہ گزشتہ روز خودکش حملے میں پشاور ہائی کورٹ کی گاڑی کا ڈرائیور جاں بحق اور چار جج زخمی ہوئے تھے۔
