پشاور: ملک میں شہباز شریف کی حکومت کے بعد مہنگائی اپنی بلند ترین سطح پر پہنچ چکی ہے، ایسے میں پشاور ہائیکورٹ بار ایسوسی ایشن نے حکومت سے اقتصادی ایمرجنسی کے نفاذ کا مطالبہ کر دیا ہے۔
تفصیلات کے مطابق پشاور ہائیکورٹ بار ایسوسی ایشن نے حالیہ مہنگائی پر شدید تحفظات کا اظہار کیا ہے، وکلا نے مہنگائی کنٹرول کرنے میں ناکامی پر حکومت مخالف تحریک شروع کرنے کا عندیہ دے دیا۔
پشاور ہائیکورٹ بار ایسوسی ایشن نے پٹرولیم مصنوعات کی قیمتوں میں اضافہ مسترد کر دیا، صدر ایسوسی ایشن نے اپنے بیان میں کہا کہ حکومت نے عالمی اداروں کے دباؤ میں مہنگائی کا بوجھ عوام پر ڈال دیا ہے، حکومت فوری طور پر اقتصادی ایمرجنسی نافذ کرے۔
رحمان اللہ نے مطالبہ کیا کہ پارلیمنٹرینز اور سرکاری ملازمین کا مختص پٹرول، بجلی، گیس اور وی آئی پی پروٹوکول کا کوٹہ فوری ختم کیا جائے، ملک کی موجودہ معاشی صورت حال کی وجہ سے دفاعی بجٹ کو بھی کم کرنے پر غور کیا جائے۔
صدر ہائیکورٹ بار ایسوسی ایشن نے کہا کہ حکومت معاشی بہتری کے لیے اقتصادی ماہرین پر مشتمل بورڈ تشکیل دیں، اور مہنگائی کنٹرول کرنے کے لیے ہنگامی اقدامات اٹھائے۔
انھوں نے کہا کہ حکومت مہنگائی کنٹرول کرنے میں ناکام ہوئی تو وکلا کے پاس حکومت مخالف تحریک شروع کرنے کے علاوہ کوئی آپشن نہیں ہوگا۔
