پشاور: پولیس لائنز پشاور میں ہونے والے خودکش حملے میں شہدا کی تعداد سو ہوگئی جبکہ سات زخمیوں کی حالت تشویشناک ہے۔
ترجمان لیڈی ریڈنگ اسپتال (ایل آر ایچ) کے مطابق تھانہ پولیس لائنز کی مسجد کے اندر خود کش دھماکے کے نتیجے میں اب تک امام مسجد اور پولیس اہلکاروں سمیت شہدا کی تعداد 100 ہوگئی جبکہ 53 افراد زخمی ہیں۔
ترجمان کا کہنا ہے کہ شہید افراد کی شناخت ہوگئی ہے ، جس کے بعد متعدد لاشیں لواحقین کے حوالے کردی گئی ہےامدادی ٹیموں نے سرچنگ کا عمل مکمل کرلیا ہے اور کچھ دیر بعد مسجد کے احاطے سے ملبہ ہٹانے کا کام شروع کردیا جائے گا۔
گذشتہ روز پشاور پولیس لائنز کی مسجد میں خودکش دھماکے نے پورے ملک کو ہلا کررکھ دیا ہے۔
دھماکا نماز ظہر کے دوران ہوا، خودکش حملہ آور پہلی صف میں موجود تھا اور نماز کی تکبیرہوتےہی خود کو دھماکےسےاڑالیا، دھماکا اتنا شدید تھا کہ مسجد کاایک حصہ شہید ہوگیا اور قریبی عمارتوں کے شیشے ٹوٹ گئے۔
دھماکے کے وقت مسجد میں تین سو سے چارسو افراد موجودتھے، جن میں زیادہ ترپولیس اہلکارتھے۔
ادھر پولیس لائنز خودکش حملے میں شہید ہونے والے افراد کی ان کے آبائی علاقوں میں نمازجنازہ ادا کرنے کا سلسلہ جاری ہے، شہدا کو پورے اعزاز کے ساتھ سپرد خاک کیا جارہا ہے۔
