پشاور : مسجد دھماکے کے زخمی عبدالرحمان نے بتایا کہ زورداردھماکے کے بعد آگ کاشعلہ میرے منہ پر آیا اور دھواں پھیل گیا، پولیس بھائیوں کی لاشوں کے اوپر سے رینگتا ہوا باہر نکلا۔
تفصیلات کے مطابق پشاور دھماکے کے زخمی کے بیان نے رونگٹے کھڑے کردیے ، زخمی عبدالرحمان نے دھماکے کے حوالے سے بتایا کہ للہ اکبر ہی کہا تھا کہ زور دار دھماکا ہوگیا، جس کے بعد آگ کا شعلہ میرے منہ پر آیا اور دھواں پھیل گیا۔
عبدالرحمان کا کہنا تھا کہ چند منٹ بعد ہوش آیا تومحراب کی طرف روشنی نظرآئی۔۔ پھرپولیس بھائیوں کی لاشوں کے اوپرسےرینگتا ہوا باہرنکلا، مجھےاللہ نےہی بچایا۔
اسپتال میں زیرعلاج ایک اور زخمی رب نواز کا کہنا ہے چھت میرے سرپر تھی، ہوش آیا تو لاشوں کےدرمیان تھا۔
دوسری جانب پشاور دھماکے کی تحقیقات جاری ہے، بم ڈسپوزل یونٹ نےسینٹرل پولیس آفس کورپورٹ ارسال کردی ہے۔
رپورٹ میں بتایا گیا ہے کہ دھماکےمیں اب تک بال بیرنگ نہیں ملے، زیادہ نقصان چھت گرنےسے ہوا جبکہ جائے وقوعہ پر کوئی گڑھے کے شواہد بھی نہیں ملے تاہم ملبہ ہٹنے کے بعد مزید شواہد اکٹھے کیے جائیں گے۔
یاد رہے پولیس لائنزکی مسجد میں خودکش دھماکےمیں شہداء کی تعداد 100 ہوگئی ہے ، ترجمان لیڈی ریڈنگ اسپتال کے مطابق ترپن مریض زیرعلاج ہیں جس میں سات زخمی آئی سی یو میں ہیں۔
