پشاور : وزیراعلیٰ خیبرپختونخوا پرویز خٹک نے کہا ہے کہ خیبر پختونخوا میں فاٹا کے انضمام کا خیر مقدم کرتے ہیں، فاٹا کے لوگ بھی تیار ہیں کہ ہمارا سسٹم وہاں رائج کیا جائے، اختیارات فاٹا سیکریٹریٹ میں نہیں بلکہ سب اختیارات گورنر کے پاس ہونگے۔
ان خیالات کا اظہار انہوں نے پشاور میں میڈیا سے گفتگو کرتے ہوئے کیا، پرویز خٹک نے کہا کہ فاٹا اصلاحات میں کچھ غلطیاں بھی ہیں اس حوالے سے وزیر اعظم نواز شریف کو خط لکھیں گے، مجھے نہیں معلوم فاٹا سے متعلق مسودہ دیگر جماعتوں نے پڑھا بھی ہے یا نہیں۔
وزیراعلیٰ خیبرپختونخوا کا کہنا تھا کہ پنجاب سے شکایات آئی ہیں کہ وہاں کے پختونوں سے ناانصافی ہورہی ہے، ہم کل لاہورجارہے ہیں، پنجاب میں پختونوں کے ساتھ جو سلوک روا رکھا جارہا ہے اس کا جائزہ لیں گے، پنجاب کےحاکم سمجھتے ہیں کہ ہم اس ملک کاحصہ نہیں۔
انہوں نے سوال کیا کہ اگر پختون پاکستانی ہیں تو صرف ان کو ہی رجسٹرڈ کیوں کیا جارہاہے؟ رجسٹریشن کرنی ہے تو بلاتفریق سب کی ہونی چاہئیے، ہمارے پاس شناختی کارڈ ہے اور یہی ہماری نشانی ہے۔
ایک سوال کے جواب میں وزیر اعلیٰ کے پی کے کا کہنا تھا کہ پاکستان سپر لیگ جیتنے پر پشاور زلمی کو مبارک باد دیتا ہوں، جمعرات کے روز پشاور زلمی کی ٹیم کو دعوت دی ہے، تقریب میں کھلاڑیوں کو تحائف دیئے جائیں گے۔
