پشاور: خیبرپختون خواہ کے دارالحکومت میں خطرناک نشہ بنانے والی تین فیکٹریاں پکڑی گئیں، جہاں سے کروڑوں روپے مالیت کی منشیات برآمد ہوئی ہے۔
اے آر وائی نیوز کے مطابق خیبرپختون خواہ کے دارالحکومت میں پولیس نے خفیہ اطلاع پر رہائشی علاقوں میں چھاپہ مارا، ان رہائشی مکانوں میں آئس نشہ بنانے والی تین فیکٹریاں موجود تھیں۔
پولیس نے کارروائی کے مطابق خاتون سمیت فیکٹری کے چار ملزمان کو گرفتار کیا جبکہ وہاں سے منشیات برآمد کی، جس کی مالیت کروڑوں روپے کے قریب بنتی ہے۔
پولیس ترجمان کے مطابق فیکٹری سے تین موٹرسائیکلیں بھی برآمد ہوئیں ہیں، جنہیں قبضے میں لے کر تھانے منتقل کردیا گیا ہے۔
حکام کے مطابق ان فیکٹریوں میں نشہ آور گولیاں اور آئس تیار کی جاتی تھی، جسے مقامی سطح پر فروخت کیا جاتا جبکہ یہاں سے مال بیرونِ ملک بھی اسمگل کیا جاتا تھا۔ پولیس حکام کے مطابق فیکٹری سے 9 لاکھ روپے سے زائد رقم بھی برآمد ہوئی ہے۔
پشاور پولیس کی بڑی کاروائی,تھانہ خزانہ کی حدود میں قائم تین آئس فیکٹریاں سیل,کروڑوں روپے مالیت کی منشیات برآمد, خاتون سمیت چارملزمان گرفتار
کاروائی کے دوران فیکٹریوں سے 5کلوگرام سے زائد آئس، ایک لاکھ 46 ہزار سے زائد نشہ آور گولیاں،126 کلوگرام کیمیکل اور مشینری بھی برآمد کی گئی. pic.twitter.com/ULoTkaLrij
— KP Police (@KP_Police1) October 20, 2021
کارروائی کے دوران فیکٹریوں سے 5کلوگرام سے زائد آئس، ایک لاکھ 46 ہزار سے زائد نشہ آور گولیاں،126 کلوگرام کیمیکل اور مشینری بھی برآمد کی گئی ہے۔
پولیس نے ملزمان کو گرفتار کر کے مقدمہ درج کرلیا جبکہ حراست میں لیے جانے والوں سے تفتیش بھی شروع کردی، امکان ہے کہ پوچھ گچھ کے دوران ملزمان اہم انکشاف کریں گے۔