اسلام آباد: الیکشن کمیشن نے مسلم لیگ ن کی رجسٹریشن منسوخی سے متعلق دائر کردہ تمام درخواستیں مسترد کردیں۔
تفصیلات کے مطابق مسلم لیگ ن کی رجسٹریشن منسوخی سے متعلق درخواستوں پر فیصلہ سنا دیا گیا۔ الیکشن کمیشن نے مسلم لیگ ن کا نام بدلنے سے متعلق تمام درخواستیں مسترد کردیں۔
الیکشن کمیشن نے متفقہ طور پر چاروں درخواستیں مسترد کیں۔ کمیشن نے 10 ستمبر کو درخواستوں پر فیصلہ محفوظ کیا تھا۔
خیال رہے کہ الیکشن کمیشن میں مسلم لیگ ن کی رجسٹریشن منسوخی کے لیے درخواستیں پاکستان تحریک انصاف، پاکستان عوامی تحریک، رئیس عبد الواحد اور مخدوم انقلابی نامی اشخاص نے دائر کر کھی تھیں۔
درخواستوں میں مؤقف اختیار کیا گیا تھا کہ چونکہ مسلم لیگ ن سابق وزیر اعظم میاں نواز شریف کے نام پر رجسٹرڈ ہے اور نواز شریف اب نااہل اور سزا یافتہ ہوچکے ہیں لہٰذا ان کی پارٹی کی رجسٹریشن بھی منسوخ کی جائے۔
اسی نوعیت کی درخواستیں اسلام آباد اور لاہور ہائی کورٹ میں بھی دائر کی گئی ہیں جن میں کہا گیا کہ آئین کے مطابق نااہل شخص کے نام پر سیاسی جماعت قائم نہیں کی جاسکتی اور نہ ہی ایسا کوئی شخص کسی پارٹی کے اجلاس کی صدارت کا اہل ہے۔
درخواست میں کہا گیا تھا کہ سپریم کورٹ سے نااہل قرار دیے جانے کے بعد نواز شریف نے شاہد خاقان عباسی کو وزیر اعظم کے لیے منتخب بھی کیا جو ایک غیر آئینی فعل ہے۔
