The news is by your side.

Advertisement

ن لیگ کی انتخابی مہم میں اصلی شیر کے استعمال کیخلاف درخواست دائر

لاہور : مسلم لیگ ن کے امیدواروں کی انتخابی مہم میں زندہ شیر کی نمائش کے خلاف لاہور ہائیکورٹ میں درخواست دائر کردی، جس میں کہا گیا کہ زندہ جانوروں کی نمائش انتخابی ضابطہ اخلاق کی سنگین خلاف ورزی ہے۔

تفصیلات کے مطابق مسلم لیگ ن کی انتخابی مہم میں اصلی شیر کے استعمال کرنے کا اقدام ہائی کورٹ میں چیلنج کردیا گیا ، رخواست منیر احمد ایڈووکیٹ کی جانب سے دائر کی گئی ہے، درخواست میں اصلی شیر کو انتخابی مہم میں استعمال کرنے پر اعتراض اٹھایا گیا ہے۔

درخواست میں مؤقف اختیار کیا گیا کہ مریم نواز اور دیگر ن لیگی امیدواروں کی انتخابی مہم میں زندہ شیر کی نمائش انتخابی ضابطہ اخلاق کی سنگین خلاف ورزی ہے، انتخابی مہم کے دوران شیر ، چیتوں ، جنگلی بلیوں ،زندہ جانوروں اور پرندوں کی نمائش روکنے کے عدالتی حکم پر عمل درآمد سے متعلق محکمہ وائلڈ لائف سے کارکردگی رپورٹ طلب کی جائے۔

درخواست میں کہا گیا ہے کہ،جنگلی جانوروں کو قدرتی ماحول فراہم کرنے کی بجائے انتخابی مہم کا حصہ بنانا جانوروں کے حقوق کی خلاف ورزی ہے، جانوروں کے تحفظ کے لئے الیکشن کمیشن کی جانب سے تعینات ڈسٹرکٹ مانیٹرنگ افسر اور وائلڈ لائف کمیشن نے بھی جنگلی جانوروں کے تحفظ کے لئے کوئی اقدامات نہیں کیے۔

درخواست میں استدعا کی گئی ہے کہ انتخابی مہم میں اصلی شیرلانےسےشہریوں کی جان کوخطرہ ہے، اصلی شیر کو انتخابی مہم کے لیے استعمال کرنے پر پابندی عائد کی جائے اور انتخابی ضابطہ اخلاق کی پابندی یقینی نہ بنانے پر ڈسٹرکٹ مانیٹرنگ افسر کے خلاف سخت کاروائی کا حکم دیا جائے۔

الیکشن کمیشن کے شیڈول کے مطابق امیدوارآج سے تیئس جولائی تک انتخابی مہم چلاسکیں گے جبکہ امیدوار پولنگ سےاڑتالیس گھنٹے قبل انتخابی مہم ختم  کرنے کے پابند ہوں گے۔

واضح رہےکہ ملک میں 25 جولائی کو عام انتخابات ہوں گے۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں