site
stats
پاکستان

عمران خان اور شیخ رشید کی تاحیات نااہلی کی درخواست واپس

لاہور: صوبہ پنجاب کے دارالحکومت لاہور میں ہائیکورٹ نے تحریک انصاف کے سربراہ عمران خان اور شیخ رشید کی تاحیات نااہلی کے لیے درخواست واپس لینے کی بنیاد پر نمٹا دی۔

تفصیلات کے مطابق چیف جسٹس لاہور ہائیکورٹ سید منصور علی شاہ نے رانا علم دین غازی کی درخواست پر سماعت کی جس میں الیکشن کمیشن، عمران خان اور شیخ رشید سمیت دیگر کو فریق بنایا گیا ہے۔

درخواست گزار کے مطابق عمران خان اور شیخ رشید کے خواتین کے حوالے سے متعدد اسکینڈل سامنے آ چکے ہیں اور ایک کتاب میں بھی دونوں کے اسکینڈل کا ذکر کیا گیا ہے جس کے بعد عمران خان اور شیخ رشید بطور رکن پارلیمنٹ آئین کے آرٹیکل 62 اور 63 پر پورا نہیں اترتے۔

درخواست گزار نے استدعا کی کہ عمران خان اور شیخ رشید کو تاحیات نا اہل قرار دیا جائے.

سماعت کے دوران چیف جسٹس لاہور ہائیکورٹ نے استفسار کیا کہ نااہلی کے لیے درخواست تو دائر کر دی گئی ہے مگر شواہد کہاں ہیں؟ محض الزامات کی بنیاد پر کسی رکن پارلیمنٹ کو نااہل نہیں کیا جا سکتا۔

عدالت نے قرار دیا کہ معاملے کے لیے ہائیکورٹ متعلقہ فورم نہیں ہے، درخواست گزار الیکشن کمیشن سے رجوع کرے۔

درخواست گزار کی جانب سے درخواست واپس لینے کی استدعا کی گئی جسے منظور کرتے ہوئے عدالت نے درخواست نمٹا دی۔


Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top