ٹی او آرز کی تشکیل میں اپوزیشن کی دخل اندازی روکنے کی درخواست دائر -
The news is by your side.

Advertisement

ٹی او آرز کی تشکیل میں اپوزیشن کی دخل اندازی روکنے کی درخواست دائر

اسلام آباد: پاناما لیکس کے معاملے پر حکومتی ٹی او آرز کی تیاری میں اپوزیشن کی مداخلت کے خلاف لاہور ہائی کورٹ میں درخواست دائر کر دی گئی۔

اے آر وائی کے نمائندے (عابد خان) کے مطابق لاہور ہائی کورٹ میں درخواست اے کے ڈوگر ایڈووکیٹ کی جانب سے دائر کی گئی ہے جس میں موقف اختیار کیا گیا ہے کہ ’’سپریم کورٹ کے فیصلے کےتحت حکومت ٹی او آرز کی تشکیل کے لیے پارلیمانی کمیٹی قائم کرچکی ہے، جس کے لیے حکومت پوری سنجیدگی کے ساتھ ٹی او آر کی تیاری میں مصروف عمل ہے۔

 درخواست گزار کے مطابق’’اپوزیشن حکومت کی مخلصانہ کاوشوں کو سبوتاژ کرنے کی کوشش کررہی ہے جس کے باعث ملک بھر میں بے یقینی کی کیفیت پیدا ہورہی ہے اور بیرون ممالک سرمایہ کار اپنے شدید تحفظات کا اظہار کررہے ہیں۔

درخواست گزار کا موقف تھا کہ سپریم کورٹ کی جانب سے جاری فیصلے میں واضح طور کہا گیا ہے کہ اپوزیشن سمیت ہر ادارے کو حکومت کا وفادار ہونا چاہیے، سپریم کورٹ کے اس فیصلے کے تناظر میں اپوزیشن ٹی او آرز کی تشکیل میں دخل اندازی غیر قانونی ہے،ملک میں کسی بھی واقعے کی تحقیقات کے لیے آئین میں قوانین واضح ہیں جن کی روشنی میں ملکی تاریخ کے اہم معاملات کی تحقیقات کروائی گئی ہیں۔

درخواست گزار نے عدالت سے درخواست کی کہ وہ  حکومت کو ہدایات جاری کرے کہ وہ اس ضمن میں فوری طور پر ٹریبونل تشکیل دیں اور ٹی او آرز کو حتمی شکل دے تاہم ساتھ ہی اپویشن اراکین کو پابند کیا جائے کہ وہ ان ٹی او آرز مداخلت نہ کرے تاکہ پانامالیکس کی تحقیقات کو متنازع ہونے سے بچایا جائے اور اصل ملزمان کو ہر صورت کیفر کردار تک پہنچایا جائے۔

Comments

comments

یہ بھی پڑھیں