ریاض: سعودی عرب میں ماسک کی عدم فراہمی پر 3 فارمیسیوں کو سیل کردیا گیا، فارمیسیوں کے خلاف بڑی تعداد میں شکایات درج کروائی گئیں۔
سعودی ویب سائٹ کے مطابق سعودی وزارت صحت نے ملک کے مختلف علاقوں میں صارفین کو ماسک فراہم نہ کرنے والی 3 فارمیسیاں بند کردی ہیں۔
وزارت صحت کا کہنا ہے کہ تینوں فارمیسیاں مقامی شہریوں اور مقیم غیر ملکیوں کو حفاظتی ماسک فراہم کرنے میں مسلسل بہانے کر رہی تھیں، شکایات کی تصدیق ہوجانے پر تینوں کو بند کر دیا گیا۔
سعودی فوڈ اینڈ ڈرگ اتھارٹی (ایس ایف ڈی اے) نے سعودی شہریوں اور مقیم غیر ملکیوں کے لیے طمنی ایپ متعارف کروائی ہے۔ اس کی بدولت یہ پتہ چل جاتا ہے کہ کس شہر، قصبے، محلے اور سڑک پر کس فارمیسی میں حفاظتی ماسک، سینی ٹائزر اور مطلوبہ ادویات موجود ہیں یا نہیں۔
اس ایپ کی خصوصیت یہ بھی ہے کہ اس کے ذریعے متعلقہ فارمیسیوں کا صحیح پتہ بھی صارفین کو مل جاتا ہے۔
سعودی وزارت صحت، وزارت داخلہ اور وزارت بلدیات و دیہی امور کرونا وائرس کی وبا سے نمٹنے کے سلسلے میں ضروری اشیا کی فراہمی کو یقینی بنانے کے لیے اپنا کردار ادا کر رہی ہیں۔
وزارت کا کہنا ہے کہ کسی بھی ایسے ادارے کے ساتھ کسی بھی قسم کی رعایت روا نہیں رکھی جائے گی جو مقامی شہریوں اور مقیم غیر ملکیوں کو وبا سے نمٹنے کے سلسلے میں ضروری ادویات اور طبی لوازمات کی فراہمی میں غفلت اور دھوکہ دہی کرے۔
