سڈنی: آسٹریلیا کی فوٹو گرافر نے کتوں کے پاسپورٹ کی خوبصورت تصاویر بنا کر لوگوں کی توجہ حاصل کرلی۔
تفصیلات کے مطابق آسٹریلوی فوٹو گرافر نے 9 کتوں کی خوبصورت تصاویر بنانے کا انوکھا تجربہ کیا جو بہت زیادہ مقبول ہوگیا۔ بلینڈا ریچرڈ نے اپنی تصاویر سوشل میڈیا پر شیئر کیں تو انہیں صارفین نے بہت زیادہ سراہا۔ فوٹو گرافر نے بتایا کہ انہوں نے تمام مالکان کی خواہش پر ہی یہ تصاویر لیں اور پھر انہیں شیئر کیا۔
کتوں کی تصاویر کو بالکل انسانوں کی طرح لیا گیا یعنی جیسے کوئی شخص پاسپورٹ بنوانے کے لیے اپنی تصویر بنواتا ہے یہ بالکل اُسی طریقہ کار سے لی گئیں۔
غیر ملکی خبررساں ادارے کی رپورٹ کے مطابق 39 سالہ بلینڈا آسٹریلیا کے علاقے میلبرن کی رہائشی ہیں اور وہ کریٹیو ڈاگ اسٹوڈیو چلا رہی ہیں۔
اُن کا کہنا تھا کہ ’’ہم نے اپنے آئیڈیا کی وجہ سے لوگوں کی توجہ حاصل کی، بالخصوص نوائسی اور پیانٹ (کتوں) کی تصاویر کو سب نے بہت زیادہ سراہا۔
انہوں نے بتایا کہ جب یہ دونوں تصاویر بنوانے آئے تو اپنی زبان پھیر رہے تھے، اسی دوران انہوں نے اچھا سا منہ بنایا جسے میں نے کیمرے میں محفوظ کیا۔
