The news is by your side.

Advertisement

پی آئی اے نے تھیلیسیمیا میں مبتلا دو بچوں کی پائلٹ بننے کی خواہش پوری کردی

کراچی : تھیلیسیمیا کے دو مریض بچوں کو خصوصی تربیت کے ساتھ پائلٹ بنا کر پی آئی اے نے ان کی خواہش کو پورا کردیا، کیپٹن کے رینکس لگانے پر بچوں کے چہروں کی خوشی دیدنی تھی۔

تفصیلات کے مطابق پی آئی اے نے تھیلسمیا کے موذی مرض میں مبتلا دو بچوں کی پائلٹ بننے کی خواہش پوری کردی۔ اس سلسلے میں میک اے وش فاؤنڈیشن کے تعاون سے دو بچوں 12سالہ حذیفہ علوی اور سمیع حسین  کو پی آئی اے کے بوئنگ777 کے اسمولیٹر میں ایکٹو پائلٹ کی تربیت دی گئی۔

ان بچوں نے  پائلٹ بننے کی خواہش کا اظہار کیا تھا، دونوں کی صحت سے متعلق ڈاکٹرز اپنی انتہائی تشویش کا اظہار بھی کرچکے ہیں۔

پی آئی اے کے چیف پائلٹ سیفٹی اینڈ کوالٹی ایشورنس کیپٹن عامر آفتاب ٹریننگ انسٹرکٹر تھے۔ بچوں کا تربیتی سیشن پی آئی اے ٹریننگ سینٹر میں کرایا گیا۔

بعد ازاں حذیفہ علوی اور سمیع حسین کو پی آئی اے ہیڈ آفس کا دورہ بھی کرایا گیا جہاں پی آئی اے کے چیف ہیومن ریسورس آفیسر ائیر وائس مارشل سبحان نذیر سیّد اور کیپٹن عامر آفتاب نے دونوں بچوں کو کیپٹن کے رینکس لگائے اور انہیں تحائف دیئے۔

اس موقع پر میک اے وش فاؤنڈیشن کے سر پرست اعلیٰ اشتیاق بیگ اور دیگر رضا کار بھی موجود تھے۔ اشتیاق بیگ نے پی آئی اے کے صدر و سی ای او ائیر مارشل ارشد ملک کے لئے شیلڈ ائیر وائس مارشل سبحان نذیر سیّد کو پیش کی۔

اپنے پیغام میں ائیر مارشل ارشد ملک نے کہا کہ وہ بیمار بچوں کی خواہشات پورا کرنے میں میک اے وش اور اشتیاق بیگ کی کاوشوں پر انہیں خراج تحسین پیش کرتے ہیں۔

انہوں نے کہا کہ وہ اس کار خیر کے سلسلے میں ہر قسم کے تعاون لے لئیے حاضر ہیں جو پی آئی اے کی سماجی خدمات کا حصہ ہیں۔ انہوں نے بچوں کے لئیے نیک خواہشات کا اظہار کرتے ہوئے ان کی جلد صحت یابی کے لیے دعا کی۔

Comments

comments

یہ بھی پڑھیں