کراچی : پی آئی اے ائیر لیگ کے صدر شمیم اکمل نے کہا ہے کہ ہم نے ادارے میں شدید مالی بحران کے باوجود مزدوروں کی تنخواہوں میں ریکارڈ اضافہ کرایا، مزدوروں کے حق میں جو ہوسکا ہم نے کیا، قانون کے تحت ریفرنڈم کا انعقاد چاہتے ہیں۔
ان خیالات کا اظہار انہوں نے کراچی میں صحا فیوں کے اعزاز میں دئے گئے استقبالیہ سے خطاب اور بعد ازاں صحافیوں سے غیر رسمی گفتگو کرتے ہوئے کیا۔ ان کا کہنا تھا کہ ائیر لیگ نے ویٹ لیز پر جہاز لینے کی ہمیشہ مخالفت کی ہے، ویٹ لیز پر جہاز لینا قومی ائیرلائن سے دشمنی کے مترادف ہے۔
ریفرنڈم کے حوالے سے انہوں نے کہا کہ سیکشن دس ریفرنڈم سے نہیں روکتا، انتظامیہ کو دیکھنا ہوگا کہ وہ ریفرنڈم کے لیے کس طرح مواقع فراہم کرے گی، ہم ریفرنڈم کے لیے تیار ہیں اور قانون کے تحت ریفرنڈم کا انعقاد چاہتے ہیں، اب انتظامیہ کو دیکھنا ہوگا کہ وہ ریفرنڈم کا انعقاد کیسے کرائے گی؟
ایک سوال کے جواب میں ان کا کہنا تھا کہ گذشتہ برس کی گئی ہڑتال میں ہڑتالیوں کا حد سے تجاوز کرنا لازمی سروس ایکٹ کا جواز بنا، جس کی موجودگی میں تمام امیدواروں کو دشواریوں کا سامنا ہوگا، بصورت دیگر پی آئی اے کا نقصان ہوگا۔
شمیم اکمل نے کہا کہ مالی بحران سے قومی ادارہ کو نکالنے اور اس کے لئیے قربانی دینے کو تیار ہیں لیکن قربانی کا سلسلہ اوپر سے شروع کیا جائے۔ پی آئی اے کا مراعات یافتہ طبقہ ادارے کے لیے نقصان دہ ہے، ہم نے مراعات یافتہ طبقہ کے خلاف یمیشہ حکومت کی مخالفت کی۔
