پی آئی اے کا کینیڈا اور برطانیہ کی ریل سروسز کے ساتھ تاریخی اشتراک ہوگیا۔
اے آر وائی نیوز کے مطابق پی آئی اے نے ایک ہی ٹکٹ پر ہوائی اور ٹرین سفر کی سہولت فراہم کردی، مسافروں کے لیے ایئر ٹو ریل سروس کا باقاعدہ آغاز کردیا گیا ہے۔
ترجمان کا کہنا ہے کہ پی آئی اے پرواز سے ٹورنٹو پہنچنے والے مسافر ریل سروس سے مزید سفر کرسکیں گے۔
پی آئی اے ترجمان کا کہنا ہے کہ ٹورنٹو سے کینیڈا کے 8 اہم شہروں تک ریل کے ذریعے رسائی ممکن ہوگی، برطانیہ میں 50 سے زائد شہروں تک ایسیس ریل سروس کے ذریعے سفر ممکن ہوگا۔
ترجمان کا کہنا ہے کہ مسافر تمام بکنگ دفاتر سے مشترکہ ٹکٹ حاصل کرسکیں گے، رجسٹرڈ ٹریول ایجنٹس سے بھی ایئر ٹو ریل ٹکٹ دستیاب ہوگا۔
پی آئی اے ویب سائٹ سے مشترکہ ٹکٹ کی بکنگ کی سہولت موجود ہوگی، موبائل ایپ سے بھی ٹکٹ کی بکنگ کروائی جاسکتی ہے۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں