کراچی : پی آئی اے کے چیئرمین و چیف ایگزیکٹو آفیسر ثاقب عزیز نے کہا ہے کہ ادارے میں نئے سسٹم کی تنصیب سے مسافروں کو جدید سہولیات میسر ہوں گی، یہ بات انہوں نے اپنے ایک جاری بیان میں کہی۔
پی آئی اے سی ای او ثاقب عزیز نے کہا کہ پی آئی اے ٹکٹوں کی ریزرویشن، فلائٹ آپریشن، اکا ؤنٹنگ، کریو منیجمنٹ اور پروازوں کی آمدورفت و چیک ان سروس کے لیے آج سے ترکی کے نئے جدید ترین سسٹم کا استعمال شروع کر رہی ہے۔
ان کا مزید کہنا تھا کہ سسٹم کی تبدیلی وقت کے تقاضوں کے مطابق ہے، نئے سسٹم کی سب سے نمایاں خوبی یہ ہے کہ ویب سائٹ سے آن لائن بکنگ کی سہولت کو آسان ترین بنا دیا گیا ہے۔
انہوں نے کہا کہ پی آئی اے کو اس نئے سسٹم کے استعمال سے خاطر خواہ بچت ہو گی اور سسٹم کی تبدیلی سے پی آئی اے کی ٹیکنیکل صلاحیت کی استعداد اور کارکردگی میں نمایاں اضافہ ہو گا۔
نئے سسٹم پر کم وقت میں منتقلی پی آئی اے ٹیم کی انتھک محنت کا نتیجہ ہے، مسافروں کو کسی بھی قسم کی زحمت سے بچانے کے لیے پی آئی اے کی ٹیم چوبیس گھنٹے کام کر رہی ہے۔
مزید پڑھیں : پی آئی اے میں ترکش آپریٹنگ سسٹم نے کام شروع کردیا، امریکی کمپنی سے معاہدہ ختم
ترجمان پی آئی اے کے مطابق یہ جدید سسٹم پی آئی اے نے ایوی ایشن انڈسٹری کی صف اول کی ترکش آئی ٹی کمپنی ہٹ اٹ کمپیوٹر سروسز سے حاصل کیا ہے، پی آئی اے کارکنان اور ائر لائن سے منسلک ٹریول ایجنسیز کے کارکنان کو نئے سسٹم کی ٹریننگ پہلے ہی دی جا چکی ہے۔
