لاہور: پی آئی اے کا فضائی آپریشن شدید بدنظمی کا شکارہوگیا‘ قومی ایئرلائن کی جانب سے عمان کے شہر سلالہ کے لئے پروازشروع کئے جانے کی وجہ سے اندرون و بیرون ملک جانے والی پروازیں منسوخ کردی گئیں۔
تفصیلات کے مطابق لاہورسے مسقط کی پروازپی کے 229 منسوخ کردی گئی جبکہ لاہور سے اسلام آباد جانے والی پروازروانگی سے قبل ہی منسوخ کردی گئی۔لاہورسے عمان کے شہر سلالہ کیلئے شروع ہونے والی کی پہلی پرواز پی کے235تاخیرکاشکارہوگئی پرواز کو دوپہر بارہ بجکر تیس منٹ پر روانہ ہونا تھا ایک گھنٹہ تاخیر کے بعد پرواز روانہ ہوئی۔
پی آئی اے کے شعبہ مارکیٹنگ کی ناقص کارکردگی کی وجہ سے سلالہ کے لئے روانہ ہونے والی پرواز صرف 85مسافروں کو لے کر روانہ ہوئی اور نصف سے زائد طیارہ خالی رہا۔
پی آئی اے ترجمان کے مطابق سلالہ کیلئے ہفتہ وار دو پروازیں شروع کی جا رہی ہیں مسقط کے بعد سلالہ اومان کا دوسرا مقام ہے جہاں کیلئے پی آئی اے کی پروازوں کا آغاز کیا گیا ہے‘ پی آئی اے کے چیف ایگزیکٹو آفیسر برنڈ ہلڈن برانڈ کے مطابق مسافروں کی سہولت اور منافع بخش روٹس پر پروازوں کا آغاز کیا جا رہا ہے۔
