کراچی : پی آئی اے کی جانب پی ایس او کو واجبات کی ادائیگی نہ کرنے پر جہازوں کو ایندھن فراہم نہیں کیا جاسکا جس کے سبب متعدد پروازیں تاخیر کا شکار ہیں۔
تفصیلات کے مطابق پی آئی اے کی جانب سے پی ایس او کو واجبات کی عدم ادائیگی پر کراچی سےاسلام آباد جانے والی پرواز پی کے308تین گھنٹے سے زائد تاخیر کا شکار ہے۔
مذکورہ پرواز کو شام4بجے روانہ ہونا تھا،اب ممکنہ طور پرچند گھنٹے بعد روانگی متوقع ہے، پی آئی اے کی اسلام آباد سے کراچی پروازپی کے309کی روانگی میں بھی تاخیر سامنے آئی ہے۔
اطلاعات کے مطابق پرواز پی کے309 کی شام 7 بجے کے بجائے 10 بجے روانگی متوقع ہے اس کے علاوہ کراچی سے دبئی جانے والی پرواز پی کے213 بھی تاخیر کا شکار ہے۔
جہازوں کو فیول کی فراہمی بند ہونے سے متعدد پروازوں کی روانگی میں تاخیر کی وجہ سے مسافروں کو شدید پریشانی کا سامنا کرنا پڑرہا ہے۔
علاوہ ازیں پاکستان اسٹیٹ آئل (پی ایس او) کو پی آئی اے نے واجبات کی مد میں ایک کروڑ روپے ادا کرنے ہیں جن کی ادائیگی تاحال نہیں ہوسکی۔
پی ایس او کی جانب سے فیول کی عدم فراہمی کی وجہ سے ڈومیسٹک فلائٹس بھی روانہ نہ ہوسکیں، فیصل آباد سے کراچی آنے والی پرواز متاثر ہوئی ہے۔
اس کے علاوہ اسلام آباد سے سکھر جانے والی پرواز بھی تاخیر کا شکار ہے، پی آئی اے حکام کا کہنا ہے کہ پی آئی اے پی ایس او کو واجبات ادا کر رہی ہے، تاہم پروازوں کا فیول روکنے سے مسافروں کو پریشانی کا سامنا کرنا پڑرہا ہے۔
واضح رہے کہ پی آئی اے کی جانب سے 9 اکتوبر کو 150 ملین روپے ایندھن کی خریداری کے عوض ادائیگی کرنے کی یقین دہانی کرائی گئی تھی اور وعدے کے مطابق پی آئی اے نے ایک بار پھر مکمل ادائیگی نہیں کی ہے۔
