The news is by your side.

پی آئی اے نے سیالکوٹ سے شارجہ کے لئے پروازوں کا دوبارہ آغاز کردیا

کراچی : پی آئی اے کی دو ہفتہ وار پروازیں سیالکوٹ سے شارجہ کے لئے شروع کر دی گئی ہیں یہ پروازیں منگل اور جمعہ کو چلائی جائیں گی۔

سیالکوٹ سے شارجہ کے لئے شروع کی جانے والی ان پروازوں کے بعد شارجہ کے لئے پروازوں کی ہفتہ وار تعداد پانچ ہو جائے گی جن میں سے تین پہلے ہی تربت سے شارجہ کے لئے روانہ ہوتی ہیں۔

تفصیلات کے مطابق پی آئی اے اپنے بند کئے گئے منافع بخش روٹس پر پروازیں دوبارہ سے شروع کر رہی ہے۔ اس سلسلے میں لاہور سے مسقط کے بعد اب سیالکوٹ سے شارجہ کے لئے بھی پروازیں دوبارہ شروع کی جارہی ہیں۔

پی آئی اے کے صدر و چیف ایگزیکٹو آفیسر ایئرمارشل ارشد ملک نے اس موقع پر اپنے پیغام میں کہا ہے کہ سیالکوٹ پاکستانی معیشت میں ریڑھ کی ہڈی کی حیثیت رکھتا ہے اور اس کا دنیا سے تیز رفتار رابطہ نا گزیر ہے۔

پی آئی اے نے پاکستان کے پہلے نجی شعبے کے تحت چلنے والے ائر پورٹ سے سب سے پہلے اپنی پروازیں شروع کیں۔ پی آئی اے مستقبل میں سیالکوٹ سے یورپی ممالک کے لئے بھی پروازوں کی منصوبہ بندی کر رہی۔

ایئر مارشل ارشد ملک نے کہا کہ ان کی یہ کوشش ہے کہ پی آئی اے کے ریونیو میں اضافہ کیا جائے اور مسافروں کو ان کے قریب ترین ایئر پورٹس سے بہترین سفری سہولیات کی فراہمی کو یقینی بنایا جائے اور اس سلسلے میں پی آئی اے کی مارکیٹنگ ٹیم حکمت عملی طے کر رہی ہے۔

چیف ایگزیکٹو آفیسر سیالکوٹ انٹر نیشنل ایئر پورٹ،میجر جنرل (ر) محمد عابد نذیر تقریب کے مہمان خصوصی تھے، پی آئی اے کے ڈسٹرکٹ منیجر محمد عارف، اسٹیشن منیجر طارق گلزار اور پی آئی اے اور دیگر محکموں کے اعلی افسران بھی شریک تھے۔

Comments

یہ بھی پڑھیں