اسلام آباد : قومی ایئر لائن کے غیر ملکی کنسلٹنٹ بیرون ملک فرار ہو گئے انہیں ایف آئی اے نے ایئر بس 310 کی جرمن میوزیم کو مبینہ فروخت کے معاملے پر تحقیقات کے لیے طلب کیا تھا۔
تفصیلات کے مطابق پی آئی اے کے ایئربس 310 کی جرمن میوزیم کو مبینہ فروخت کے معاملے پر ایف آئی اے کی جانب سے تحقیقات کا عمل جاری ہے جس کے لیے قومی ایئر لائن کے غیرملکی کنسلٹنٹ رومن شروڈر کو طلب کیا گیا تھا تا ہم وہ بیرون ملک فرار ہو گئے ہیں۔
واضح رہے کہ رومن شروڈر ایئر بس310 کی مبینہ فروخت کے لیے قائم کی گئی ٹیم کے کمانڈر تھے اور اسی نسبت سے ایف آئی اے نے انہیں 11 اپریل کو طلب کیا تھا تاہم انہوں نے کہا تھا کہ وہ 17 اپریل کو دستیاب ہوں گے اورخود پیش ہوجائیں گے لیکن ابھی اطلاعات آئی ہیں کہ وہ ملک سے باہر چلے گئے ہیں۔
اے آر وائی کے رپورٹر صلاح الدین کا کہنا ہے کہ رومن شروڈر ایف آئی اے کو اطلاع دیئے بغیر 14 اپریل کو غیر ملکی ایئر لائن کی پرواز نمبر 601 سے دبئی روانہ ہو گئے ہیں جب کہ کل انہیں ایف آئی اے کی ٹیم کے سامنے پیش ہونا تھا۔
خیال رہے سابق قائم مقام جرمن سی ای او کی سفارش پران کے ہم وطن کو ایئرلائن میں 13 لاکھ روپے تنخواہ پر کنسلٹنٹ بھرتی کیا گیا تھا تاہم انہیں چند روز قبل پی آئی ا ے سے فارغ کردیا گیا تھا۔
