ملتان: پاکستان انٹرنیشنل ایئرلائن (پی آئی اے) نے سعودی عرب شہر القسیم کے لیے پروازوں کا آغاز کردیا، پی آئی اے کی پہلی پرواز ملتان سے 96 مسافروں کو لے کر القسیم روانہ ہوگئی۔
اے آر وائی نیوز کی رپورٹ کے مطابق پی آئی اے کی پہلی پرواز ملتان سے 96 مسافروں کو لے کر سعودی عرب کے شہر القسیم روانہ ہوگئی، ملتان ایئرپورٹ پر پی آئی اے کے اسٹیشن منیجر و عملے نے مسافروں کو الوداع کیا۔
ترجمان پی آئی اے عبداللہ خان کا کہنا ہے کہ پی آئی اے القسیم کے لیے ایئربس 320 طیارے آپریٹ کرے گی، القسیم میں پاکستانیوں کی بڑی تعداد رہتی ہے جنہیں پی آئی اے کی پروازوں سے سفری سہولیات میسر ہوگی۔
پی آئی اے ترجمان کا کہنا تھا کہ پی آئی اے القسیم کے لیے ملتان اور اسلام آباد سے پروازیں جاری رکھے گی، القسیم اور البریدہ میں رہنے والے پاکستانیوں کا عرصہ دراز سے مطالبہ تھا کہ براہ راست پروازیں شروع کی جائیں۔
نمائندہ اے آر وائی نیوز کے مطابق القسیم ایئرپورٹ پر پی آئی اے کی پہنچنے والی پہلی پرواز کو واٹر کینن سلیوٹ پیش کیا جائے گا۔
پی آئی اے کی پروازیں بدھ اور جمعہ کو بالترتیب ملتان اور اسلام آباد سے روانہ ہوں گی اور 40 کلو سامان کی حد کے ساتھ تعارفی کرایہ بھی ان پروازوں پر لاگو ہوگا۔
