The news is by your side.

Advertisement

قومی ایئر لائن 80 مسافروں کا سامان جدہ ایئر پورٹ پر چھوڑ آئی

ریاض سے ملتان کے لیے پی آئی اے کی پرواز کراچی ایئر پورٹ پر اتار لی گئی

کراچی: قومی ایئر لائن کی ’با کمال سروس‘ نے ایک اور کمال دکھا دیا، 80 مسافروں کا سامان جدہ ایئر پورٹ پر چھوڑ کر آ گئی۔

تفصیلات کے مطابق پاکستان انٹرنیشنل ایئر لائن (پی آئی اے) جدہ سے کراچی آنے والی پرواز پی کے 732 کے مسافروں کا سامان جدہ ایئر پورٹ ہی پر چھوڑ آئی۔

اے آر وائی نیوز کے نمایندے کے مطابق قومی ایئر لائن کی پرواز کے جناح ٹرمینل پر لینڈ کرنے کے بعد 80 مسافروں کا سامان جدہ ہی میں رہ جانے کا انکشاف ہوا، مذکورہ پرواز سے 195 کے قریب مسافر کراچی ایئر پورٹ پر پہنچے تھے۔

تازہ ترین:  پروازوں کی منسوخی اور تاخیر، اسلام آباد ایئرپورٹ پر مسافروں کا احتجاج

جدہ سے پرواز آج صبح کراچی پہنچی تھی، سامان نہ پہنچنے کے انکشاف پر مسافر سراپا احتجاج بن گئے، مسافروں کے احتجاج پر انھیں بتایا گیا کہ جہاز کم گنجایش والا تھا جس کی وجہ سے سامان کو جدہ ہی میں چھوڑنا پڑا۔

ایئر پورٹ ذرایع کا کہنا تھا کہ سامان سے محروم مسافروں کو کل دوسری پرواز سے ان کا سامان پہنچانے کا دلاسا دیا گیا ہے۔

دوسری طرف آج ریاض سے ملتان جانے والی پی آئی اے کی پرواز پی کے 730 موسم کی خرابی کے باعث کراچی ایئر پورٹ پر اتار لی گئی ہے، ترجمان قومی ایئر لائن کا کہنا تھا کہ موسم ٹھیک ہوتے ہی پرواز کو ملتان روانہ کر دیا جائے گا۔ ترجمان نے یہ بھی کہا کہ کراچی ایئر پورٹ پر پی آئی اے کا عملہ مسافروں کو تمام سہولت فراہم کر رہا ہے۔

fb-share-icon0
Tweet 20

Comments

comments

یہ بھی پڑھیں