The news is by your side.

Advertisement

خورشیدشاہ کا ایم ڈی پی آئی اے کو برطرف کرنے کا مطالبہ

اسلام آباد : پی آئی اے اے ٹی آر طیارہ حادثے پر پیپلزپارٹی نے ایم ڈی پی آئی اے کی برطرفی کا مطالبہ کردیا جبکہ تحریک انصاف نے تحقیقات عالمی سطح پر کرانے کا مطالبہ کردیا۔

پی آے اے طیارہ حادثہ پر پیپلزپارٹی نے ایم ڈی پی آئی اے کو فوری برطرف کرنے کا مطالبہ کردیا ہے، اپوزیشن لیڈر خورشید شاہ کا کہنا ہے کہ طیارہ حادثے میں پی آئی اےکوبری قرارنہیں دیاجاسکتا، باہر سے درآمد ایم ڈی پی آئی اے کو ساٹھ سے ستر لاکھ کا پیکج دیا جارہا ہے۔

سید خورشید شاہ کا کہنا ہے کہ کوئی بھی پائلٹ جان بوجھ کر اپنی جان خطرے میں نہیں ڈالتا اورحویلیاں طیارہ حادثے کے ذمہ دار ایم ڈی پی آئی اے ہیں، اے ٹی آر طیارے بلندی والے علاقوں کے لئے نہیں ہیں، تحقیقات کرکے رپورٹ کو سامنے لایا جانا چاہیے۔

اپوزیشن لیڈر کا کہنا تھا کہ پیپلزپارٹی نے حکومت کو4 مطالبات پیش کئے ہیں، اگر مطالبات تسلیم نہ ہوئے تو حکومت کےلئے بہت مشکل ہوجائے گی

دوسری جانب پی ٹی آئی نے طیارہ حادثے کی تحقیقات عالمی سطح پر کرانے کا مطالبہ کردیا، علیم خان کا کہنا تھا کہ تحقیقات عالمی سول ایوی ایشن آرگنائزیشن سے کرائی جائے، اب تک ہونیوالے حادثات کی کبھی جامع تحقیقات نہیں ہوسکی۔

دوسری جانب طیارہ حادثے پر بابر اعوان نے سپریم کورٹ میں درخواست دائر کرادی ہے، درخواست اسلام آباد بار ایسوسی ایشن کے صدر کی جانب سے دائر کی گئی، درخواست میں مؤقف اختیار کیا گیا کہ حادثات کے لحاظ سے پی آئی اے دنیا کی پانچ بدترین کمپنیوں میں شامل ہے، عدالت پی آئی اے سے فلائٹ سیفٹی کے معیار پر ریکارڈ طلب کرے۔


مزید پڑھیں : طیارہ حادثہ: جنید جمشید‘ دیگرشہداکی شناخت کا عمل جاری


یاد رہے کہ گذشتہ روز چترال سے اڑان بھرنے والے پی آئی اے کے طیارے کا ایبٹ آباد سے حویلیاں کے درمیان رابطہ منقطع ہوگیا تھا اور جہازحویلیاں کے نزدیکی علاقے میں گرکرتباہ ہوگیا تھا‘ جس میں 48 افراد سوار تھے، جن میں معروف مذہبی اسکالر جنید جمشید بھی اہلیہ سمیت شامل تھے۔

Print Friendly, PDF & Email

Comments

comments

یہ بھی پڑھیں