The news is by your side.

Advertisement

پی آئی اے : ملازمت سے رضاکارانہ علیحدگی اسکیم میں تبدیلی

کراچی : پی آئی اے انتظامیہ نے ریگولر ملازمین کے لیے ملازمت سے رضاکارانہ علیحدگی کی اسکیم میں تبدیلی کردی ہے جس کے تحت ریگولرملازمین سے ٹریننگ پر اٹھنے والے اخراجات کی رقم وصول نہیں کی جائے گی۔

تفصیلات کے مطابق پی آئی اے ملازمین کے لئے ملازمت سے رضاکارانہ علیحدگی کی اسکیم پر باقاعدہ کام شروع کیا جاچکا ہے، اس حوالے سے وہ مستقل ملازمین جنہوں نے بوجوہ ملازمت تربیت حاصل کی تھی ان سے تربیت پر اٹھنے والے اخراجات کا معاوضہ نہیں لیا جائے گا۔

ذرائع کے مطابق رضا کارانہ علیحدگی اسکیم سے استفادہ کرنے والے ملازمین سے پی آئی اے کے واجبات، قرضوں، ایڈوانسز اورانکم ٹیکس کی کٹوتی کی جائے گی۔

اس کے علاوہ انکم ٹیکس آرڈیننس کے تحت حاصل چھوٹ کا اطلاق کیا جائے گا تاہم پی آئی اے انتظامیہ کا کہنا ہے کہ ملازمین کے انکم ٹیکس کی ادائیگی ان کی اپنی ذمہ داری ہے۔

واضح رہے کہ پی آئی اے ملازمین کے لئے ملازمت سے رضاکارانہ علیحدگی کی اسکیم پر باقاعدہ کام شروع کیا جاچکا ہے،18سال سے زائد اور کم ملازمت پر مبنی دو کیٹگریز کے لئے اسکیم کی کارروائی میں تیزی آگئی ہے۔

اس حوالے سے ذرائع کا کہنا ہے کہ وی ایس ایس اسکیم کی گائیڈ لائنز پر مکمل عملدرآمد کے لئے 72 کوآرڈینیٹرز تعینات کیے گئے ہیں یہ کوآرڈینیٹرز ائرلائن کے مختلف شعبوں اور اندرون ملک پی آئی اے اسٹیشنز پرتعینات کئے گئے ہیں۔

ذرائع کے مطابق کوآرڈینیٹرز 9سی ایس ایس اسکیم کی 9 نکاتی گائیڈ لائن پر عملدرآمد کو یقینی بنائیں گے اور متعلقہ ملازم کو وی ایس ایس درخواست پراسیسنگ میں معاونت کریں گے۔

Comments

یہ بھی پڑھیں