The news is by your side.

Advertisement

لاہور سے لندن جانے والی پرواز میں مسافروں کو عملے نے تھپڑ مار دیا

لاہور: لندن جانے والی پی آئی اے کی پرواز میں مسافر اور عملے کے درمیان جھگڑا ہونے پر عملے کے رکن نے مسافروں کو تھپڑ مار دیا۔

تفصیلات کے مطابق پیر کے روز لاہور سے لندن جانے والی پرواز پی کے 757 میں مسافر اور عملے کے درمیان تلخ کلامی پر عملے نے مسافروں کو تھپڑ رسید کر دیا، اے آر وائی نیوز نے واقعے کی ویڈیو بھی حاصل کر لی۔

رپورٹ کے مطابق بلک ہیڈ نشست پر شروع ہونے والا جھگڑا تکرار سے مار کٹائی تک جا پہنچا تھا، دوران پرواز دو مسافر بنا ادائیگی کے بلک ہیڈ نشستوں پر جا بیٹھے تھے، کیبن کریو نے مسافروں کو بلک ہیڈ نشستوں سے اٹھ کر واپس اپنی نشستوں پر جانے کا کہا تو تکرار شروع ہو گئی۔

مسافروں اور کیبن کریو کی تکرار بڑھنے پر دونوں فریق آپس میں الجھ پڑے، اے آر وائی نیوز کو ملنے والی ویڈیو میں کیبن کریو کے ایک رکن کو مسافروں کو تھپڑ مارتے ہوئے صاف دیکھا جا سکتا ہے، عملے کے رکن نے پہلے مرد مسافر کو تھپڑ مارا اور پھر خاتون مسافر کو بھی تھپڑ رسید کر دیا۔

بعد ازاں عملے نے کپتان کو مسافروں کی شکایت کی، جھگڑے کی اطلاع ہیتھرو ائیرپورٹ پر سیکورٹی کو بھی دی گئی جس پر پرواز کے ہیتھرو ائیرپورٹ اترتے ہی دونوں مسافروں کو لندن پولیس نے حراست میں لے لیا۔

ادھر پی آئی اے انتظامیہ نے کہا ہے کہ اس واقعے کا نوٹس لیا گیا ہے، جی ایم فلائٹ سروس کا کہنا تھا کہ دوران پرواز عملے کو مسافروں پر ہاتھ نہیں اٹھانا چاہیے تھا، عملے کے خلاف تحقیقات کی جا رہی ہیں۔

fb-share-icon0
Tweet 20

Comments

comments

یہ بھی پڑھیں