کراچی : پاکستان انٹرنیشنل ایئرلائن (پی آئی اے) نے برطانیہ جانے والوں کے لئے بڑا اعلان کردیا ، اسلام آباد سے مانچسٹر کی پہلی پرواز 25 اکتوبر کواڑان بھرے گی۔
تفصیلات کے مطابق کئی برس کے تعطل کے بعد پاکستان انٹرنیشنل ایئرلائن (پی آئی اے) کا برطانیہ کے لیے فضائی آپریشن بحال ہو گیا ہے۔
پی آئی اے کی پہلی پرواز 25 اکتوبر کو اسلام آباد سے مانچسٹر کے لیے روانہ ہوگی ، فضائی آپریشن کی بحالی دونوں ممالک کے درمیان سفری، تجارتی اور عوامی روابط کے فروغ میں سنگِ میل ثابت ہوگی۔
برطانوی ہائی کمشنر جین میریٹ نے پی آئی اے کی واپسی کو خوش آئند قرار دیتے ہوئے کہا کہ “پاکستانی ایئرلائن کی برطانوی فضاؤں میں واپسی ایک تاریخی لمحہ ہے۔ یہ پرواز دونوں ملکوں کو مزید قریب لائے گی۔
مزید پڑھیں : پاکستان سے برطانیہ جانے والے مسافروں کی بڑی مشکل آسان ہوگئی
انہوں نے مزید کہا کہ سفری رابطوں کی بحالی نہ صرف کاروبار اور سیاحت کے لیے مفید ہے بلکہ برطانیہ میں مقیم پاکستانی کمیونٹی کے لیے بھی سہولت فراہم کرے گی۔
برطانوی حکام نے ایئرلائن انتظامیہ کی کوششوں اور معیارِ پرواز کی بہتری کو سراہتے ہوئے امید ظاہر کی کہ یہ اقدام مستقبل میں دونوں ممالک کے درمیان ہوائی سفر کے مزید راستے کھولے گا۔
ذرائع کے مطابق ابتدائی مرحلے میں اسلام آباد سے مانچسٹر، لندن اور برمنگھم کے لیے پروازوں کی بحالی کا منصوبہ تیار کیا جا رہا ہے۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں