کابل: افغانستان سے طالبان کے آنے کے بعد بھاگنے والے متعدد پائلٹ واپس ملک پہنچ گئے۔
تفصیلات کے مطابق افغان وزیر دفاع مولوی محمد یعقوب کی دعوت پر افغانستان چھوڑ کر مختلف ممالک جانے والے 5 پائلٹس افغانستان پہنچ گئے ہیں۔
افغان وزیر دفاع نے افغانستان آمد پر پانچوں پائلٹس کا استقبال کیا اور انھیں نقد انعام بھی دیا، وزیر دفاع نے وطن لوٹنے والے افغان فضائیہ کے پانچوں پائلٹس کو یقین دہانی کرائی کہ وہ پورے اطمینان سے افغانستان میں رہ کر ملک کی خدمت کریں۔
پانچوں پائلٹوں نے اس عزم کا اظہار کیا کہ وہ افغانستان کی خدمت کریں گے۔
واضح رہے کہ افغانستان کی طالبان حکومت کے عہدیدار ملک چھوڑ کر جانے والے مختلف شعبوں کے ماہرین سے رابطہ کر کے انھیں وطن واپس لانے کے معاملے پر کام کر رہے ہیں۔
وطن چھوڑ کر جانے والوں کو یقین دلایا جا رہا ہے کہ وہ محفوظ رہ کر افغانستان میں کام کر سکتے ہیں۔ خیال رہے کہ افغان وزیر دفاع ملا یعقوب مجاہد افغان طالبان کے بانی سربراہ ملا محمد عمر کے صاحب زادے ہیں۔
