آپ کو یاد ہوگا چند روز قبل اسپین میں ایک دریا کے پانی کا رنگ سبز ہوگیا تھا۔ رنگ کی تبدیلی پانی میں ڈالے جانے والے کیمیائی مادوں کی وجہ سے ہوئی تھی جو پانی کا تجزیہ کرنے کے لیے ڈالے گئے تھے۔
ایسا ہی ایک واقعہ کینیڈا کے ایک قصبے میں بھی پیش آیا جب اچانک نلکوں سے گلابی رنگ کا پانی بہنے لگا۔ رہائشیوں نے خوفزدہ ہو کر نلکے کھلے چھوڑ کر پانی کو بہہ جانے دیا جس کے باعث ہزاروں گیلن پانی ضائع ہوگیا۔
کینیڈا کے شمال مغرب میں واقع قصبہ ایڈمنٹن میں شہری اپنے گھروں کے نلکوں سے گلابی رنگ کے پانی کو بہتا دیکھ کر خوفزدہ اور تشویش کا شکار ہوگئے۔
تاہم جلد ہی قصبے کے میئر نے پیغام جاری کیا کہ یہ پانی استعمال کے لیے بالکل محفوظ ہے اور اس میں کسی قسم کے زہریلے مواد کی آمیزش نہیں۔
انہوں نے بتایا کہ قصبے کو پانی فراہم کرنے والے فلٹریشن پلانٹ کی صفائی کے لیے پوٹاشیئم استعمال کیا گیا ہے۔ اس کے بہت زیادہ استعمال سے پانی کا رنگ گلابی ہوجاتا ہے البتہ اس کے کوئی مضر نتائج نہیں ہوتے۔
انہوں نے شہریوں کی پریشانی پر معذرت کا اظہار بھی کیا۔
لیکن ان کا بیان جاری ہونے سے قبل ہی قصبے کے افراد ہزاروں گیلن پانی ضائع کر چکے تھے۔
میئر کے اعلان کے بعد لوگوں نے شدید برہمی کا اظہار کرتے ہوئے کہا کہ انتظامیہ کو پہلے سے اس بات کا اعلان کرنا چاہیئے تھا تاکہ قصبے میں بلا وجہ خوف و ہراس نہ پھیلتا۔
