The news is by your side.

Advertisement

طیارہ حادثہ، خاتون کی تلاش میں اہلخانہ جائے حادثہ پہنچ گئے، رقت آمیز مناظر

کراچی: پی آئی اے طیارہ حادثے میں جاں بحق مسافروں کے لواحقین کو میتیں حوالے کرنے کا سلسلہ جاری ہے، حادثے میں جاں بحق ایک خاتون نفیسہ زہرہ کے اہلخانہ لاش نہ ملنے پر جائے حادثہ پہنچ گئے۔

اے آر وائی نیوز کی رپورٹ کے مطابق بدقسمت پی آئی اے کے طیارہ حادثے میں جاں بحق ہونے والی خاتون نفیسہ زہرہ کے اہلخانہ جائے وقوعہ پہنچ گئے جہاں جذباتی اور رقت آمیز مناظر دیکھنے میں آئے۔

جاں بحق ہونے والی خاتون کی 35 سالہ بہن کا کہنا تھا کہ نفیسہ زہرہ لاہور میں مقیم بیمار بہن کی تیمار داری کے لیے گئی تھی، وہ لاہور میں 4 ماہ قیام کے بعد عید گھر پر منانے کے لیے لاہور سے کراچی آرہی تھی۔

بہن طاہرہ کا کہنا تھا کہ ہمارے صبر کا پیمانہ لبریز ہوچکا ہے، ارباب اختیار سے اپیل ہے بہن کی میت حوالے کی جائے۔

مزید پڑھیں: طیارہ حادثہ، مسافر المناک کہانی چھوڑ‌ گئے

والدہ کا کہنا تھا کہ حادثے کے بعد ایک لمحے کے لیے بھی سکون سے نہیں سو سکے، نفیسہ زہرہ چھوٹی ہونے کی وجہ سے گھر بھر کی لاڈلی تھی، ڈی این اے ٹیسٹ کے باوجود میت حوالے نہیں کی جارہی ہے۔

ان کا کہنا تھا کہ کبھی چھیپا جاتے ہیں، کبھی ایدھی جاتے ہیں اور کبھی اسپتالوں کے چکر لگاتے ہیں ہم بہت پریشان ہوگئے ہیں کسی طرح میت ہمیں مل جائے لیکن ہمیں کہیں سے بھی کوئی جواب نہیں دیا جارہا ہے، جائے حادثہ پر اس لیے آئے ہیں کہ ہمیں پتا چل جائے کہ ہماری بچی کہاں ہے۔

واضح رہے کہ چند روز قبل جمعتہ الوادع کے روز پی آئی اے کا طیارہ ایئرپورٹ کے قریب ماڈل کالونی جناح گارڈن میں رہائشی آبادی پر گر کر تباہ ہوگیا تھا جس کے نتیجے میں 97 مسافر ہلاک اور 2 معجزانہ طور پر بچ گئے تھے۔

Comments

یہ بھی پڑھیں