کراچی: صوبہ سندھ کے دارالحکومت کراچی سے اسلام آباد جانے والی سرین ایئر کی پرواز کے انجن میں خرابی پیدا ہوگئی، ایئرپورٹ ذرائع کا کہنا ہے کہ کچھ عرصہ قبل اسی طیارے کے دوسرے انجن میں بھی خرابی پیدا ہوئی تھی۔
تفصیلات کے مطابق کراچی سے اسلام آباد جانے والی سرین ایئر کی پرواز ای آر 502 میں خرابی پیدا ہوگئی، طیارے کے کپتان نے کنٹرول ٹاور سے رابطہ کرنے کے بعد طیارے کی کراچی ایئرپورٹ پر ٹیکنیکل لینڈنگ کروائی۔
ایئرپورٹ ذرائع کا کہنا ہے کہ طیارے کو کراچی ایئرپورٹ پر بحفاظت اتار لیا گیا۔
ایئر لائن انتظامیہ کا کہنا تھا کہ فنی خرابی کے باعث پرواز کو کراچی اتارا گیا جس کے بعد مسافروں کو لاؤنج منتقل کردیا گیا۔
دوسری جانب ذرائع کا کہنا ہے کہ طیارے کے انجن میں خرابی پیدا ہوئی تھی، انجینیئر طیارے کی خرابی دور کرنے کی کوشش کر رہے ہیں۔ مسافروں کو متبادل پرواز کے ذریعے اسلام آباد روانہ کیا جائے گا۔
ذرائع کے مطابق کچھ عرصہ قبل اسی طیارے کے دوسرے انجن میں بھی خرابی پیدا ہوئی تھی۔
