ساؤپولو: برازیل میں چھوٹا طیارہ گر کر تباہ ہوگیا جس کے نتیجے میں پائلٹ ہلاک ہوگیا، طیارے میں سوار دیگر 6 مسافر محفوظ رہے۔
غیرملکی خبررساں ادارے کے مطابق طیارہ گرنے کا حادثہ برازیل کے علاقے ساؤپولو کی ایئرفیلڈ پر پیش آیا جس کے نتیجے میں پائلٹ ہلاک ہوگیا جبکہ طیارے میں سوار دیگر 6 مسافر محفوظ رہے۔
طیارہ گرنے سے ایک زوردار دھماکا سنائی دیا جس کے بعد طیارے میں آگ لگ گئی، طیارے میں سوار 6 مسافروں نے فوری طور پر جہاز سے کود کر اپنی جان بچائی۔
حادثہ کمپودے مارتے ہوائی اڈے پر مقامی وقت کے مطابق شام چھ بجے کے قریب پیش آیا، طیارہ زمین سے ٹکرا کر الٹ گیا اور اس میں آگ لگ گئی۔
پائلٹ طیارے میں لگنے والی آگ کی لپیٹ میں آگیا اور کسی قسم کی امداد ملنے سے قبل ہی جان کی بازی ہار گیا،عینی شاہدین کے مطابق حادثے سے قبل فضا میں طیارے کی رفتار معمول سے زیادہ اور معمول سے کم بلندی پر تھا۔
مقامی میڈیا کے مطابق طیارہ پلاسٹک کی مصنوعات بنانے والی کمپنی کی ملکیت تھا اور اس کے دو بانی طیارے میں موجود تھے۔