The news is by your side.

Advertisement

پی ایس ایل چھٹےایڈیشن کی پلیئر ڈرافٹنگ آج لاہور میں ہوگی

لاہور: پاکستان سپرلیگ کے چھٹے ایڈیشن کی پلیئرز ڈرافٹنگ تقریب آج لاہور میں ہوگی، ڈرافٹنگ میں پہلےکھلاڑی کی پک اسلام آباد یونائیٹڈ کرے گی۔

تفصیلات کے مطابق پاکستان سپرلیگ کے چھٹے ایڈیشن کی پلیئرز ڈرافٹنگ تقریب آج لاہور میں ہوگی، جہاں چھ فرنچائز پلاٹینئیم، ڈائمنڈ، گولڈ، سلور اور ایمرجنگ کیٹگری سے کھلاڑیوں کا انتخاب کریں گی۔

ڈرافٹنگ میں پہلےکھلاڑی کی پک اسلام آباد یونائیٹڈ کرے گی، آسٹریلیا انگلینڈ، نیوزی لینڈ اور جنوبی افریقہ کے کھلاڑیوں سمیت چار سو سے زائد کرکٹرز نے پی ایس ایل سکس کے ڈرافٹ کیلئے رجسٹریشن کرائی ہے۔

پی ایس ایل6: کراچی کنگز میں کون سے کھلاڑی برقرار رہینگے؟

گذشتہ روز پی ایس ایل کے چھٹے سیزن کے لئے دفاعی چیمپئن کراچی کنگز نے برقرار کھلاڑیوں کی فہرست جاری کی تھی، کراچی کنگز کے کپتان عماد وسیم، بابراعظم، محمد عامر کو ٹیم میں برقرار رکھا گیا ہے، اس کے علاوہ شرجیل خان، عامریامین، وقاص مقصود، ارشداقبال بھی کراچی کنگزکا حصہ رہیں گے۔

کراچی کنگز نے ایلکس ہیلز کی جگہ کولن انگرام کو ٹیم میں شامل کیا، کولن انگرام کو ایلکس ہیلز کی جگہ اسلام آباد یونائیٹڈ سےٹریڈ کیا گیا تھا۔کراچی کنگز کےبابراعظم اور محمدعامرپلاٹینئم کیٹگری میں برقرار ہیں، کپتان کراچی کنگز عماد وسیم ڈائمنڈ ، عامر یامین اور شرجیل خان گولڈکیٹگری میں برقرار ہیں، وقاص مقصود سلور اور ارشد اقبال ایمرجنگ کیٹگری میں موجود رہینگے۔

پی ایس ایل 6 کا شیڈول

پاکستان سپرلیگ کی جانب سے جاری ہونے والے شیڈول کے مطابق پی ایس ایل سیزن 6 کا آغاز 20 فروری سے ہوگا جبکہ فائنل 22 مارچ کو کھیلا جائے گا، سیزن 6 کے تمام میچز پاکستان میں ہی کھیلے جائیں گے، جن کے لیے لاہور اور کراچی کے اسٹیڈیمز کا انتخاب کیا گیا ہے۔

پہلے راؤنڈ کے تمام میچز کراچی کے نیشنل اسٹیڈیم میں کھیلے جائیں گے، جن میں سے پہلا 20 فروری بروز ہفتہ کراچی کنگز اور کوئٹہ گلیڈی ایٹرز کے مابین کھیلا جائے گا۔ مجموعی طور پر کراچی میں 20 اور لاہور میں فائنل سمیت 13 میچز کھیلے جائیں گے۔

کراچی میں اکیس فروری کو دن اور رات میں دو میچز کھیلے جائیں گے جن میں سے پہلا دن میں لاہور قلندرز اور پشاور زلمی جبکہ دوسرا رات میں اسلام آباد یونائیٹڈ اور ملتان سلطانز کے درمیان ہوگا۔

کراچی کنگز اپنا دوسرا میچ 24 فروری کو اسلام آباد یونائیٹڈ کے خلاف کھیلے گی جبکہ تیسرا 28 فروری کو لاہور قلندرز کے خلاف ہوگا، تین مارچ کو دن میں کراچی کنگز اور پشاور زلمی مد مقابل ہوں گی جبکہ 7 مارچ کو کراچی کنگز اور اسلام آباد یونائیٹڈ کے مابین رات کے وقت میچ کھیلا جائے گا۔

دوسرے مرحلے میں کراچی کنگز کا پہلا میچ دس مارچ کو پشاور زلمی سے ہوگا، 13 مارچ کو کنگز گلیڈی ایٹرز سے ٹکرائیں گے اور 14 مارچ کو روایتی حریت لاہور قلندرز سے ٹاکرا ہوگا۔

Comments

یہ بھی پڑھیں