The news is by your side.

Advertisement

عوام جانتے ہیں کون ترقی کی سیاست کرتے ہیں اور کون انتشار کی، وزیر اعظم

اسلام آباد: وزیر اعظم نواز شریف نے کہا ہے کہ ہماری حکومت پہلی بار کوئلہ سے بجلی بنائے گی۔ عوام جانتے ہیں کون ترقی کی سیاست کرتے ہیں اور کون انتشار کی، کچھ لوگ صرف اقتدار کا حصول چاہتے ہیں۔

وزیر اعظم میاں محمد نواز شریف نے پارلیمانی پارٹی کے اجلاس سے خطاب کرتے ہوئے کہا کہ ہماری حکومت پہلی بار کوئلے سے بجلی بنائے گی۔ یہ کام 30، 40 سال پہلے ہوجانا چاہیئے تھا۔ جب یہ کوئلہ استعمال ہوگا اور اس سے بجلی بنے گی تو بجلی باہر سے منگوانے کی ضرورت نہیں پڑے گی۔

انہوں نے کہا کہ 46 بلین سرمایہ کاری کی پاک چین اقتصادی راہداری چین کا بہت بڑا تعاون ہے۔ جب چینی صدر پاکستان آئے تو انہوں نے خاص طور پر مجھ سے کہا کہ یہ آپ کے لیے تحفہ ہے۔ وہ ایک عرصہ سے ہماری حکومت کے منتظر تھے۔

وزیر اعظم نے کہا کہ گوادر کو خیبر پختونخوا کے ساتھ ملایا جارہا ہے۔ اسے سندھ اور پنجاب سے بھی ملایا جائے گا۔ گوادر پر بین الاقوامی ایئر پورٹ بنا رہے ہیں، ایک وقت آئے گا جب سب گوادر پر فخر کریں گے۔

انہوں نے بتایا کہ صوبوں کو نہ صرف آپس میں ملایا جارہا ہے بلکہ وسطی ایشیا سے ملانے کے منصوبے پر کام کریں گے تاکہ خواشحالی کی نئی راہیں کھلیں۔

بلوچستان کے لیے ترقیاتی کام

میاں محمد نواز شریف نے کہا کہ آج بلوچستان کی ترقی کے لیے کام ہورہا ہے۔ پچھلی حکومت نے ’آواز حقوق بلوچستان‘ کا منصوبہ شروع کیا لیکن اس سے بھی حالات قابو میں نہیں آئے۔ آج وہاں ترقی کی نئی راہیں کھل رہی ہیں۔ بلوچستان میں سڑکوں کا جال بچھ رہا ہے۔ کچھ سی پیک منصوبے کی ہیں کچھ وفاقی حکومت بنا رہی ہے۔ وہاں دہشت گردی کا خاتمہ بھی ہوچکا ہے۔

کراچی بہتر ہوچکا ہے

کراچی کا ذکر کرتے ہوئے وزیر اعظم نے کہا کہ 2013 کے مقابلے میں آج کا کراچی بہت پرامن اور بہتر ہے۔ ایک وقت تھا جب تاجر اور صنعت کار کراچی آنے سے خوفزدہ تھے اور کہتے تھے کہ کراچی کے بجائے دبئی آکر میٹنگ کرلیں۔ آج وہ بلا خوف و خطر کراچی آتے ہیں۔

انہوں نے کہا کہ اب وہاں دہشت گردی کا خاتمہ ہوچکا ہے۔

وزیر اعظم کے مطابق کراچی کو پانی کی فراہمی کے منصوبوں پر وفاقی حکومت بھی اپنا حصہ ڈال رہی ہے۔

وزیر اعظم نے آپریشن ضرب عزب اور کراچی آپریشن میں جام شہادت نوش کرنے والے فوجیوں، پولیس اہلکاروں اور عام عوام کو خراج تحسین پیش کیا۔

مخالفین پر تنقید

وزیر اعظم نے کسی کا نام لیے بغیر مخالفین پر کڑی تنقید کرتے ہوئے کہا کہ عوام جانتے ہیں کون ترقی کی سیاست کرتے ہیں اور کون انتشار کی۔ کچھ لوگ صرف اقتدار کا حصول چاہتے ہیں۔ ہم پر کرپشن کا کوئی کیس نہیں۔

انہوں نے کہا کہ میں ہزار مرتبہ اپنی حکومت پر پاکستان کو ترجیح دیتا ہوں۔ ہماری حکومت نے ملک کے ہر حصہ میں ترقیاتی کام شروع کیے۔

واضح رہے کہ وزیر اعظم آج سارک ممالک کی وزرائے داخلہ کانفرنس سے بھی خطاب کیا تھا۔

Print Friendly, PDF & Email

Comments

comments

یہ بھی پڑھیں