The news is by your side.

Advertisement

پاک بھارت ایٹمی جنگ کا خطرہ مسئلہ کشمیر کے حل تک رہے گا، وزیراعظم آزاد کشمیر

مصطفرآباد: وزیراعظم آزاد کشمیر راجہ فاروق حیدر نے کہا ہے کہ جب تک مسئلہ کشمیر حل نہیں ہوتا پاکستان اور بھارت کے درمیان ایٹمی جنگ کا خطرہ رہے گا۔

تفصیلات کے مطابق پریس کانفرنس کرتے ہوئے راجہ فاروق حیدر کا کہنا تھا کہ لائن آف کنٹرول پر بھارت کی بدترین جارحیت جاری ہے جس کی وجہ سے شہریوں کی زندگی اجیرن ہوچکی۔

انہوں نے مطالبہ کیا کہ مقبوضہ کشمیر میں بھی بھارتی مظالم کا سلسلہ جاری ہے، اقوام متحدہ مقبوضہ کشمیر میں خصوصی تحقیقاتی  کمیشن بھیجے جس کے بعد دودھ کا دودھ اور پانی کا پانی ہوجائے گا۔

مزید پڑھیں: جموں کشمیرلبریشن فرنٹ پرپابندی کے خلاف مقبوضہ وادی میں ہڑتال

اُن کا کہنا تھا کہ مقبوضہ کشمیر کے ساتھ لائن آف کنٹرول پر بھی بھارت کی بدترین جارحیت کا سلسلہ جاری ہے جس کی وجہ سے اسکول، اسپتال اور بازار متاثر ہورہے ہیں، شہری خوف کی وجہ سے گھروں سے باہر نہیں نکل پاررہے۔

راجہ فاروق حیدر کا کہنا تھا کہ آزاد کشمیر حکومت لائن آف کنٹرول پر متاثرین کے لیے ہر ممکن اقدامات کررہی ہے۔

یاد رہے کہ کشمیر میں قابض بھارتی فوج کے مظالم کا سلسلہ جاری ہے جس کی وجہ سے اب تک متعدد نوجوان شہید ہوچکے ہیں، کٹھ پتلی انتظامیہ نے حریت رہنما یاسین ملک کی جماعت کشمیر لبریشن فرنٹ پر پابندی عائد کردی  جس کے خلاف وادی میں مکمل ہڑتال ہے۔

یاد رہے کہ جموں کشمیر لبریشن فرنٹ سے قبل بھارت مقبوضہ کشمیر میں جماعت اسلامی پر بھی پابندی لگا چکا ہے۔

یہ بھی پڑھیں: بھارتی فوج کی ایل او سی چکوٹھی سیکٹر پر بلا اشتعال فائرنگ، 2 شہری شہید 4 زخمی

کشمیر میڈیا سروس کی رپورٹ کے مطابق گزشتہ ماہ مقبوضہ کشمیر میں بھارتی فوج نے 27 کشمیریوں کو شہید کیا جبکہ پیلٹ گن، فائرنگ اور شیلنگ کے نتیجے میں 184 کشمیری زخمی بھی ہوئے۔

بھارتی فورسز کی جانب سے گزشتہ ماہ حریت رہنماؤں سمیت 681 شہریوں کو گرفتار کیا گیا اور 42 گھروں کو نقصان بھی پہنچایا گیا۔

Comments

comments

یہ بھی پڑھیں